A rôh hôp tơpui tơno, Ngế pro xiâm hnê ngăn Chin phuh xuân rơkâu tơƀrê dêi hneăng tâ phĭu rah xo kăn Hô̆i đong cheăm/bêng hneăng 5 dêi Kul khế 6 kố nah; loi khât mê cho xiâm ki kal vâ Kul châ ƀlêi trâng a hneăng tâ phĭu Kuô̆k hô̆i hơnăm 2023 ƀă pơtối châ pêi mâu hnoăng cheăng kân kĭn tâ nếo tung tơdroăng mơjiâng tơnêi têa Kul hơniâp lĕm, tơniăn, môi tuăn tơrá kuăn pơlê,  hơniâp ro kro mơdrŏng.

Ngế pro xiâm hnê ngăn tơnêi têa pơkâ thế pơtối rak vế hnoăng cheăng dêi kơ koan ‘na luât péa tơnêi têa tung mơdêk tơrŭm cheăng pơla péa pâ

Pôa Phạm Minh Chính, Ngế pro xiâm hnê ngăn tơnêi têa ƀă Kăn xiâm hnê ngăn Kuô̆k hô̆i Kul vâ môi tuăn pơtối tơrŭm tơbleăng pêi rơhéa mâu tơdroăng  tơhrâ ƀă luât pơkâ tơrŭm cheăng nôkố ‘na cheăng lêng, kring vế tơniăn ing hnoăng cheăng pêi tơƀrê kân ƀă kal kí hiăng châ pêi pro; pơtối mơ-eăm mơdêk pêi klêi 16% tơdroăng cheăng ki hâi pêi ‘na klâ xoăng tíu tâp tơneăn hdró tơkăng kong ki u ối vâ mơjiâng pro troăng tơkăng kong hơniâp, tơrŭm tơrôa ƀă mơnhông mơdêk ton ta ah pơla péa tơnêi têa.