Tiô rơkong krếo thế dêi pôa Samdech Techo Hun Sen, Ngế pro xiâm hnê ngăn kong têa Kul, Kăn xiâm hnê ngăn ASEAN 2022, pôa Phạm Minh Chính, Ngế pro xiâm hnê ngăn tơnêi têa pin kô lăm pôu kong têa Kul sap ing hâi lơ 8 – 9/11 ƀă veăng hôp a Rôh hôp Khu râ kăn xiâm ASEAN ƀă mâu rôh hôp ki ai tơdjâk sap ing hâi lơ 10 – 13/11. Kố cho rôh lăm pôu păng ‘nâng troh a kong têa Kul ki apoăng dêi pôa Phạm Minh Chính tung hnoăng cheăng Ngế pro xiâm hnê ngăn Chin phuh ƀă cho rôh lăm pôu ki apoăng dêi kăn pơkuâ xiâm Việt Nam troh a Kul tung Hơnăm tơrŭm tơroâ việt Nam – Kul 2022.

Rôh lăm pôu kố po tung pơla tơrŭm cheăng tơnêi têa ki vâ chê tơniăn lĕm, tơrŭm tơroâ tiô khôi hmâ, tơrŭm tung tâi tâng, krá tơniăn, ton xŏn pơla Việt Nam ƀă Kul pơtối mơnhông tơniăn. Péa pâ tơrŭm tơkŭm po hên tơdroăng cheăng ki ai pơxúa, tơbâ 55 hơnăm mơjiâng tơrŭm cheăng tơpui kâ. Tung rôh lăm pôu tiô tối hdrối, pôa Phạm Minh Chính kô tơpui ƀă pôa Samdech Techo Hun Sen rơtế ƀă pôa Hun Sen veăng hôp ƀă tơpui hnê mơhno a Rôh hôp pơkâ mơdêk ‘no liăn cheăng tê mơdró Việt Nam – Kul, kô tơpui tơno ƀă Pơtáu Norodom Sihamoni, kăn xiâm hnê ngăn Kuô̆k hô̆i cho pôa Say Chhum, Kăn hnê ngăn Kuô̆k hô̆i cho pôa Heng Samrin ƀă trâm mâu kăn pơkuâ dêi Kul.