Kơxo lơ 11/1, pôa Phạm Minh Chính, Ngế pro xiâm hnê ngăn tơnêi têa ƀă Khu kăn xiâm Việt Nam hiăng troh a pơlê kong xiâm Vieng Chăn pơxiâm lăm pôu păng ‘nâng Kŏng hòa Yân chuh Nhân yân Lếo ƀă rơtế pơkuâ po Hneăng hôp rôh má 45 Vi ƀan tơrŭm Chin phuh Việt Nam – Lếo, tiô rơkong krếo thế dêi Ngế pro xiâm hnê ngăn tơnei têa Kŏng hòa Yân chuh Nhân yân Lếo cho Sonexay Siphandone.

Tiô tơdroăng, tung rôh lăm pôu Lếo, pôa Phạm Minh Chính ai rôh tơpui tơno ƀă pôa Sonexay Siphandone, Ngế pro xiâm hnê ngăn kong têa Lếo; koh hmât pôa Thongloun Sisoulith; kăn xiâm pơkuâ hnê ngăn cheăng Đảng, kăn xiâm hnê ngăn kong têa Lếo; veăng a leh mơgêi Hơnăm Tơrŭm tơroâ pơla Việt Nam – Lếo, Lếo – Việt Nam 2022; tơpui tơno ƀă pôa Saysomphone Phomvihane; kăn xiâm hnê ngăn Kuô̆k hô̆i Lếo; pôu mâu kăn pơkuâ Đảng, Tơnêi têa Lếo; rơtế tơkŭm po Hneăng hôp má 45 Vi ƀan tơrŭm Chin phuh Việt Nam – Lếo; veăng hôp a Rôh hôp tơrŭm ‘no liăn cheăng Việt Nam – Lếo; trâm mâ kuăn pơlê Việt Nam a Lếo.

Rôh lăm pôu Lếo kố dêi pôa Phạm Minh Chính ƀă Khu kăn xiâm Việt Nam veăng kum ‘mâi mơnhông, mơdêk tơrŭm cheăng kân, tơrŭm tơviah, tơrŭm tung tâi tâng, loi tơngah pơla péa Đảng péa tơnêi têa Viẹt Nam – Lếo.