Roh lăm pôu pêi cheăng dêi Ngế pro xiâm hnê ngăn Chin phuh châ pói tơngah kô cho ivá mơhnhôk nếo ăm mâu kơvâ tơrŭm tiô khôi vâi krâ nah, mơjiâng tơdroăng ki tơtêk nếo mơdêk mâu kơvâ tơmeăm ki ai hlâ ƀă ki má môi cho mơjiâng môi troăng pêi krá tơniăn tơdroăng loi tơngah kal kí vâ po troăng ăm môi hneăng tơrŭm cheăng nếo pơla Việt Nam ƀă pái kong têa xuân môi tiah lâp kơpong.

Roh lăm pôu pêi cheăng cho troăng pêi pro păng ‘nâng, hên hĭn troăng tơpui kâ ƀă kong têa ê dêi Hneăng hôp Đảng lâp tơnêi têa roh má XIII, troăng hơlâ hên troăng, hbrâ, thăm veăng mot tơrŭm lâp plâi tơnêi trâu rơdâ, tung mê, kơjo ai hên kơchơ tê mơdró, khu tơrŭm cheăng, ai hên troăng mơjiâng pro ăm, kum pơtối pro krá tơniăn tơdroăng hơniâp lĕm, tơrŭm cheăng, mơhnhôk hên mâu kơxô̆ liăn kum mơnhông tơnêi têa.