Hâi lơ 1/3, tung tơdroăng pêi cheăng a mâu kong pơlê kơpong Tơdế tơnêi têa, pôa Phạm Minh Chính, Ngế pro xiâm hnê ngăn tơnêi têa lăm séa ngăn mâu tơdroăng tơkêa pro troăng prôk xiâm mê cho: Troăng kân tơdrăng Quảng Ngãi - Hoài Nhơn, pơla troăng tơkâ luâ mâu klôh Đức Phổ ƀă klôh Bình Đê; troăng kân Hoài Nhơn - Quy Nhơn ƀă tơdroăng tơkêa bro troăng tơƀai vâ hdrâp kơxô̆ 2 ƀă mâu tơmeăm khoăng pêi tơdrêng dêi tơraih tơƀai Phù Cát, kong pơlê Gia Lai.

A tíu mơjiâng pro troăng tơƀai vâ hdrâp kơxô̆ 2 ƀă mâu tơmeăm khoăng pro tơdrêng mê dêi Tơraih tơƀai Phù Cát, kong pơlê Gia Lai, Ngế pro xiâm hnê ngăn tơnêi têa khĕn kơdeăn tuăn mơ-eăm pêi cheăng kơhnâ piu dêi tơná dêi mâu kih sư, kŏng nhân ôh tá xâu kong tô kong mêi mơ-eăm pêi ‘’bú mơdoh pơtê kâ hmê, koi iâ tê há’’.

Mơnhên ngăn a tíu pro ƀă tâng tối tơbleăng a tíu pêi pro, Ngế pro xiâm hnê ngăn tơnêi têa pơkâ thế mâu tíu pêi cheăng tơdjâk troh mơ-eăm pro iâ hâi khế mơjiâng pro tung pơla 3 khế, thế rak tơniăn pái khế apoăng hơnăm 2026 tơmeăm khoăng ki pro mê thế châ xúa, teăng a khế 9/2026 môi tiah pơkâ hdrối. Pakĭng mê, pâ thế tung la ngiâ thế pêi tơƀrê drêng mâu tơmeăm mê châ xúa; pơcháu ăm kong pơlê Gia Lai rak ngăn hlối xúa tơƀrê Tơraih tơƀai Phù Cát tiô luât pơkâ “ngế ki lâi pêi cheăng lĕm tro má môi pơcháu ăm ngế ki mê”.