Kơxo hâi lơ 9/5, pôa Phạm Minh Chính, Ngế pro xiâm hnê ngăn tơnêi têa pơkuâ djâ khu kăn Việt Nam lăm troh a Indonesia veăng Hôp mâu kăn xiâm ASEAN rôh má 42. Hneăng hôp drêng kố pơxá: “Môi ASEAN râ ki kân’’ ki xiâm dêi tơdroăng mơnhông mơdêk cheăng kâ”, Indonesia - cho kong têa pro kăn xiâm hnê ngăn ASEAN  2023 kô tơbleăng tối hên tơdroăng pêi ahdrối, hriăn plĕng ki nếo vâ mơdêk kâi hbrâ ví dêi ASEAN ƀă chông djâ ASEAN chiâng môi tơdroăng mơnhông tung lâp plâi tơnêi.

Tung mê, tơmâng khât troh kring tơniăn on tơhrik, tơniăn kê kâ, mơdêk khăm pơlât, tơniăn ‘na liăn ngân cheăng kâ, ƀă hên tơdroăng pâ thế tung tâi tâng pái tơdroăng ki xiâm tung kuăn pơlê. Mâu rôh hôp dêi khu kăn xiâm ASEAN 42 kô tơkŭm tơpui ‘na tơdroăng vâ mơjiâng khu kong têa tung ASEAN, hneăng hôp kŭn kô tơpui tơno mâu tơdroăng tung lâp plâi tơnêi ƀă tung kơpong rơtế tơmâng vâ ‘nâi.

Tiô tối hdrối Hneăng hôp ASEAN rôh má 42 kô tơbleăng hên tơdroăng ki kal ‘na mâu kơvâ cheăng tung tơrŭm ‘na kal kí - kring tơniăn, cheăng kâ ƀă mơhnho túa lĕm tro  rêh ối pơlê pơla.