Kơxê lơ 27/4, a Hà Nội, pôa Phạm Minh Chính, Ngế pro xiâm hnê ngăn tơnêi têa mơhnhôk Khế kŏng nhân – Khế pêi pro rak tơniăn pêi cheăng hơnăm 2023. A leh mơhnhôk, pôa Phạm Minh Chính, Ngế pro xiâm hnê ngăn tơnêi têa tối nhên, dế ối rêh nah, pôa Hồ Chí Minh, Kăn xiâm hnê ngăn tơnêi têa hneăng apoăng đi đo hlê plĕng, vâ kum, tŏng kum tơdroăng rêh ối dêi kuăn pơlê ƀă mơngế pêi cheăng ƀă hiâm mơno tuăn pâ trâu hơngế.

Tơdroăng tơmâng dêi Pôa Hồ châ mâu rơxông pơkuâ Đảng, Tơnêi têa pơtối pêi tiô, hiăng pơkuâ, hnê mơhno ƀă tơbleăng, pêi pro hên troăng pơkâ pêi, troăng hơlâ mơjiâng khu pêi cheăng. Tung la ngiâ, Ngế pro xiâm hnê ngăn tơnêi têa pơkâ thế đi đo tơmâng, kum ƀă thăm tah lôi mâu tơdroăng pá puât, tơvâ tơvân, tơniăn hnoăng ƀă ki pơxúa luât, tơxâng dêi kŏng nhân, mơngế pêi cheăng.

Ngế pro xiâm hnê ngăn tơnêi têa tối rơdêi hên hnoăng cheăng ƀă mâu khu xiâm, kơvâ cheăng kong pơlê ƀă Tô̆ng liên đoân pêi cheăng Việt Nam, tung mê ai hnoăng tơniăn tơdroăng pêi krá tơniăn, mơdêk kơlo rêh ối, pro tơniăn tơdroăng pêi cheăng dêi kŏng nhân; tơkŭm pêi pro châ tơƀrê kơxô̆ liăn kơjo 120.000 rơtal liăn ăm mơjiâng hngêi ối pơlê pơla, hngêi ối kŏng nhân.

Tơdrêng amê, Ngế pro xiâm hnê ngăn tơnêi têa pơkâ rĕng ai troăng mơdêk tung tơdroăng pêi cheăng tơnêi têa, mơdêk ki rơkê, ki chiâng pêi, ki má lối ki chiâng pêi cheăng ăm mơngế pêi cheăng.