VOV4.Xơ Đăng - Drêng veăng ai mâu a tơdroăng “Hâi hơ’lêh kơxô̆ kơvâ cheăng hngêi rak liăn” xua Hngêi rak liăn Tơnêi têa Việt Nam tơkŭm po, hâi lơ 4/8, pôa Phạm Minh Chính, Ngế pro xiâm hnê ngăn Chin phuh hiăng pêi cheăng ƀă kăn pơkuâ Hngêi rak liăn tơnêi têa ƀă kăn pơkuâ mâu hngêi rak liăn tê mơdró. Ngế pro xiâm hnê ngăn tơnêi têa pơkâ thế mâu hngêi rak liăn mơ-eăm kơdroh liăn hrê, mơ-eăm kơdroh liăn laih, ‘no hrê ăm mung, veăng kum mâu tơdroăng ki xơpá, ôh tá mơhúa, tŏng kum khu mơdró kâ ƀă mâu ngế ki mung ƀă kal hbrâ rơnáu, kơhnâ tâ nếo tung tơdroăng ki veăng tung mâu troăng hơlâ, tơdroăng túa pơkâ mơnhông mơdêk cheăng kâ rêh ối pơlê pơla dêi Đảng ƀă Tơnêi têa, malối cho ăm mung mơjiâng pro hngêi trăng ăm kŏng nhân, mâu ngế ki pêi lo liăn iâ.

Ngế pro xiâm hnê ngăn tơnêi têa pơcháu Hngêi rak liăn Tơnêi têa mơjiâng pro troăng hơlâ vâ mâu hngêi rak liăn mơhnŏng vâ veăng xêh, pêi pro tung hiâm mơno mơdêk tuăn hiâm lĕm tung tê mơdró, pôu râng dêi hnoăng cheăng ƀă pơlê pơla ƀă hiâm mơno lĕm ƀă pơlê xiâm, tơnêi têa, kuăn pơlê.

Katarina Nga tơplôu ƀă tơbleăng