VOV4.Xơ Đăng - Klêi rôh séa ngăn, pôa Phạm Minh Chính, Ngế pro xiâm hnê ngăn tơnêi têa ƀă khu kăn pêi cheăng ƀă Kăn hnê ngăn Pơlê kong kân Hồ Chí Minh ‘na tơdroăng cheăng kâ rêh ối khế 7 ƀă 7 khế apoăng hơnăm ƀă mâu tơdroăng tơkêa bro ‘no liăn cheăng ki kal dêi pơlê kong kân. Tơbleăng a rôh pêi cheăng, pôa Phan Văn Mãi, Kăn hnê ngăn Vi ƀan Pơlê kong kân Hồ Chí Minh ăm ‘nâi, tơdroăng ki mơdêk pê lo GRDP 6 khế apoăng hơnăm dêi pơlê kong kân Hồ Chí Minh tâk 3,83%, ki tâk ing khế pŭn troh khế tơdrốu tâk luâ tâ hdrối pái khế apoăng hơnăm.

Pôa Phạm Minh Chính, Ngế pro xiâm hnê ngăn tơnêi têa pêi cheăng ƀă kăn hnê ngăn Pơlê kong kân Hồ Chí Minh

‘Na tơdroăng cheăng pêi mâu khế pơtối mơ’nui hơnăm, pơlê kong kân kô tơkŭm pêi mâu troăng rơhlâ tơmâng tŏng kum pêi châ tơ-brê 19 tơdroăng pơkâ cheăng kâ-rêh ối pơlê pơla ing apoăng hơnăm Hô̆i đong hnê ngăn hiăng tơbleăng. Ƀă kô mơ-eăm pêi châ tơbrê môi tiah pơkâ sap 6- 6,5%. Tơbleăng a rôh pêi cheăng, rơtế ƀă hlối khĕn kơdeăn mâu hnoăng hiăng pêi tơ-brê, Ngế pro xiâm hnê ngăn tơnêi têa tối pơchân, Pơlê kong kân Hồ Chí Minh kal pơtối séa ngăn, lêi tah ki xơpá, tơvâ tơvân ăm tơdroăng pêi pro, tê mơdró tung kong pơlê, séa ngăn tâi tâng, tơ’nôm troăng rơhlâ mơdêk ki tơ-brê tung mơjiâng kơphô̆, ‘mâi pơ’lêh tơdroăng ‘no liăn cheăng, tê mơdró; mơ-eăm pêi châ tiô pơkâ luâ 19 tơdroăng pơkâ ‘na cheăng kâ -rêh ối hơnăm 2022.

Ngế pro xiâm hnê ngăn tơnêi têa xuân pơcháu hnoăng cheăng nhên ăm mâu khu xiâm, kơvâ cheăng vâ tơrŭm ƀă hlối tơleăng mơnhên tro tiô pơkâ râ kơpêng mâu tơdroăng tối, pâ thế dêi Pơlê kong kân Hồ Chí Minh.

Gương tơplôu ƀă tơbleăng