Kơxo lơ 13/6, a Hà Nội, pôa Phạm Minh Chính, Ngế pro xiâm hnê ngăn tơnêi têa pêi cheăng ƀă Khu pơkuâ tơdroăng cheăng ƀă Khu chêh hlá tơbeăng Việt Nam klăng leh tơbâ 98 hơnăm Hâi Hlá tơbeăng kăch măng Việt Nam 21/6. Xông tơpui a roh pêi cheăng pôa Phạm Minh Chính, Ngế pro xiâm hnê ngăn tơnêi têa mơnhên, Hlá tơbeăng cho ki vâ pơtâng tối ‘na hiâm mơno khôi túa lĕm tro dêi Đảng, tung mê, Khu chêh hlá tơbeăng Việt Nam ai hnoăng kal khât tung rŭm môi tuăn, tơkŭm, mơdêk ki khên tơnôu kal kí, hnê tơdroăng cheăng, pơtâp hiâm mơno tơdroăng cheăng dêi ngế chêh hlá tơbeăng.

Pôa Phạm Minh Chính pơtroh rơkong rơkâu lĕm má môi ƀă kheăn kơdeăn păng ‘nâng, tá hiâm mơno kheăn kơdeăn mâu tơdroăng châ tơƀrê, tơdroăng veăng kum kal khât dêi Khu chêh hlá tơbeăng Việt Nam ƀă mâu ngế chêh hlá tơbeăng lâp tơnêi têa.

Ngế pro xiâm hnê ngăn tơnêi têa pơkâ thế Khu chêh hlá tơbeăng Việt Nam hbrâ rơnáu tâ nếo tung mơnhên troăng prôk la ngiâ ăm khu chêh hlá tơbeăng thăm hriăn plĕng troăng hơlâ ƀă thăm veăng tơdroăng pơtâng tối troăng hơlâ; thăm hơ’lêh nếo troăng tơmiât pêi ‘na tơdroăng xiâm, kum mơdêk châ tơƀrê tơbleăng tơtro tơdroăng, tơdroăng ki kuăn pơlê pơla rơhêng vâ ‘nâi plĕng; khŏm mơjiâng khu mơngế chêh hlá tơbeăng rơkê; ‘mâi rơnêu mâu tơdroăng ki ôh tá tro ‘na hiâm mơno tung pêi cheăng, mơdêk ki kơnâ tro tung tơdroăng chêh hlá tơbeăng, xo ki lĕm mơdât ki ‘mêi, xo ki tro mơdât ki ôh tá lĕm tro, kum mơnhông, mơhnhôk tơdroăng ki tro ‘ló tung pơlê pơla. Pêi lĕm tro hnoăng séa ngăn, tiâ tối; tơbleăng tơtro tơdroăng, teăm tơdrêng, tơdrăng lĕm.