Kơxê lơ 14/5, pôa Phạm Minh Chính, Kăn cheăng tung Khu xiâm kal kí, Ngế pro xiâm hnê ngăn Chin phuh pêi cheăng ƀă khu râ kăn pơkuâ pơlê kong kân Cần Thơ vâ mơnhên tơdroăng mơjiâng pro tơmeăm, tê mơdró, mơ’no liăn cheăng, tê ngi kong têa ê; mâu tơdroăng ki u ối, pá puât ƀă rơtế pơkâ troăng tah lôi pá puât, mơnhông mơdêk tung pơlê kong kân.

Mơgêi roh pêi cheăng, pôa Phạm Minh Chính mơnhên, kheăn kơdeăn tơdroăng mơ-eăm ƀă tơdroăng châ tơƀrê dêi Đảng ƀô̆, khu râ kăn pơkuâ, khu lêng ƀă kuăn pơlê pơlê kong kân Cần Thơ, kum hên, châ tơƀrê rơtế lâp tơnêi têa tơniăn cheăng kâ kân, mơdât liăn chu rơpâ yă, tơniăn mâu tơdâng tơ’mô kân, thăm mơdêk tơtêk, mơdêk tơdroăng rêh ối kế tơmeăm khoăng ƀă hiâm mơno dêi kuăn pơlê.

‘Na hnoăng cheăng tung la ngiâ, Ngế pro xiâm hnê ngăn Chin phuh pơkâ pơlê kong kân Cần Thơ pơtối séa ngăn, ‘nâi nhên tơdroăng; hmiân tuăn, krá chân, hbrâ xêh, teăm tơdrêng, ƀeăn ƀĕng rơkê, châ tơƀrê vâ pêi mâu hnoăng cheăng đi đo, mâu tơdroăng ki kơdrâ, mâu tơdroăng ki u ối; tơkŭm tah lôi pá puât, tơvâ tơvân ăm kuăn pơlê, khu tê mơdró vâ thăm mơnhông mơdêk pêt mơjiâng tơmeăm, tăng cheăng pêi ăm kuăn pơlê.