A rôh  hôp, mâu kăn tối mâu tơdroăng tung péa khế apoăng hơnăm 2026, Điện Biên pêi tơƀrê mâu tơdroăng, hên tơdroăng hlo hơ’lêh, pro xiâm ăm tơdroăng pơkâ tâk tung plâ hơnăm. Tối mơgêi rôh pêi cheăng, Ngế pro xiâm hnê ngăn tơnêi têa pơkâ thế kong pơlê tơbleăng pêi kơtăng,  pêi tơdrêng  tâi tâng mâu troăng hơlâ, mơ-eăm pei châ a kơlo tâk cheăng kâ sap 11% tơngi klêng tung hơnăm 2026. Tung mê, kong pơlê kal tơkŭm  tăng pêi ai pơxúa tơƀrê dêi mâu hngêi kơmăi on tơhrik, mơnhông cheăng ƀă kơmăi kơmok uâ pơliê pro tơmeăm, on tơhrik; hlối mơdêk ‘mâi mơnhông ‘na chiâk deăng tiô troăng pêi lo tơmeăm tê mơdró, mơjiâng luât, pơkâ kơjo kuăn pơlê pơ’lêh hdrê loăng pêt, mơnhông pêt loăng mắc ca, kơphế ƀă mâu tơmeăm ki xiâm.

Kơmăng hâi ki mê, veăng Leh mơdĭng Reăng Ban ƀă pơxá “Reăng Ban - púi vâ Điện Biên”, Ngế pro xiâm hnê  ngăn tơnêi têa tơngah kong pơlê pơtối rak vế ki môi tuăn dêi rơpó, rak vế ƀă tơbleăng túa vêa vong, tơmeăm khoăng ai hlâu ‘na kong kế chiâng tơmeăm khoăng ki xiâm mơnhông krá tơniăn ton ăm kơpong Tây Bắc.