VOV4.Xơ Đăng - Kơxê lơ 25/7, pôa Phạm Minh Chính, Ngế pro xiâm hnê ngăn tơnêi têa lăm pôu, pêi cheăng ƀă mâu tíu pêi cheăng séa ngăn ADN kơxêng kiâ mâu mố đô̆i hlâ ai hnloăng ki tá hâi ‘nâi tŭm tơdroăng mê cho Viện Pháp y dêi lêng, Khu xiâm pơkuâ ngăn lêng; Viện pháp y dêi tơnêi têa, Khu xiâm ngăn pơkeăng pơlât ƀă Viện Kŏng nghê̆ sinh hok, Viện Hàn lâm khoa hok ƀă kŏng ngê̆ Việt Nam.

A rôh pêi cheăng, pôa Phạm Minh Chính tối tơdroăng hơ’muăn ki hmâ rơrêk tung hiâm mơno, tá kâi piu tơdroăng phiu ro dêi môi ngế Nôu Việt Nam khên tơnôu a Nghệ An drêng tăng châ ‘nâi kơxêng kiâ môi ngế kuăn kơ’nâi 51 hơnăm hlâ xúa tơplâ, xuân môi tiah tơkôm ton tĭn dêi nôu hdrối vâ prôk dêi mơngế kuăn dêi nôu xuân hâi kâi tăng hlo kơxêng.

Ngế pro xiâm hnê ngăn tơnêi têa rơtế ƀă teăng mâ mâu khu xiâm, kơvâ cheăng pơcháu hiăng klêi séa ngăn ADN 12 ngế ki hlâ ai hnoăng

Tơdroăng tơplâ hiăng rế vâ piu la tơdroăng khéa kho, châi heăng xuân ối hlo malối ƀă mâu rơpŏng hngêi nhŏng o mâu ngế hlâ ai hnoăng tơnêi têa; hrĭng rơpâu ngế hlâ ai hnoăng hâi châ ‘nâi inâi tíu ối cho hrĭng rơtuh tơdroăng khéa kho, tơchĕng tơmiât dêi mâu ngế ki ối rêh.

Ngế pro xiâm hnê ngăn tối, Đảng Tơnêi têa, ƀă kuăn pơlê pin đi đo tơmâng troh tơdroăng cheăng mâu lêng rong râ, hlâ hía vâ hơlêm tơdroăng khéa kho châi heăng ƀă tơdroăng pêi pro ki pơxúa khât, tung mê, ai tơdroăng mơdêk ki tơ-brê dêi tơdroăng cheăng lăm rôu tăng, tơkŭm ƀă mơnhên inâi kơxêng kiâ mâu ki hlâ ai hnoăng ki hâi teăm ‘nâi.

A rôh pêi cheăng, pôa Phạm Minh Chính hiăng hlo leh tơbleăng ăm ‘nâi, séa ngăn ADN dêi mâu ngế ki hlâ ai hnoăng; rơtế ƀă mâu kăn dêi mâu khu xiâm, kơvâ cheăng séa ngăn mơnhên ADN ăm 12 ngế ki hlâ ai hnoăng; ăm hlá mơ-eá kơdĭng liăn kơnâ 10 rơtuh liăn/hlá mơ-éa ƀă tơmeăm hbru ăm dêi mâu rơpŏng hngêi.

Gương tơplôu ƀă tơbleăng