VOV4.Xơ Đăng - Kơxê lơ 19/8, pôa Phạm Minh Chính, Ngế pro xiâm hnê ngăn tơnêi têa pêi cheăng ‘no tơdrêng ing troăng Internet ‘na hnoăng cheăng mơnhông kơchơ tê mơdró ƀă kơ koan teăng mâ tê mơdró Việt Nam a kong têa ê. A rôh hôp, Ngế pro xiâm hnê ngăn Chin phuh rơtế ƀă Kăn xiâm pơkuâ ngăn cheăng kơmăi kơmok ƀă tê mơdró, mâu khu xiâm, kơvâ cheăng hôp ‘no tơdrêng ing troăng hyôh Internet ƀă mâu tơdroăng pơkuâ Việt Nam a kong têa ê hiăng tơpui tơno mâu troăng hơlâ mơdêk xêt khât, tơƀrê hnoăng cheăng pơkuâ, mơnhông ƀă pơkâ pêi pro hơ’lêh kơchơ mơdró, pêi pro châ tơdroăng ki rơhêng vâ, hnoăng cheăng tung tơdroăng nếo.

Tâ tá rôh pêi cheăng

Mâu kăn pơkuâ Việt Nam a kong têa hiăng tơkŭm tối tơbleăng ‘na ki ai hlâu, tơdroăng ki rơhêng vâ dêi mâu kơchơ mơdró; pâ thế dêi mâu kơchơ mơdró kố; mâu troăng hơlâ vâ pêi pro châ tơdroăng ki rơhêng vâ, pâ thế dêi kơchơ mơdró. Tiô tối tơbleăng dêi Khu xiâm ngăn cheăng kơmăi kơmok ƀă tê mơdró, hơnăm 2021, kơxô̆ liăn pêi lo ing tê mơdró kâ dêi Việt Nam châ lối 670 rơtal dollars, ăm Việt Nam mot tung top 20 kong têa cheăng kâ ai túa pơkâ kân ‘na tê mơdró kân má môi lâp plâi tơnêi. 7 khế apoăng hơnăm 2022, kơxô̆ liăn pêi lo ing tê mơdró dêi Việt Nam cha lối 433 rơtal dollars.

Tiô tối hdrối tung hơnăm, kơxô̆ liăn pêi lo ing tê mơdró kô châ dâng 800 rơtal dollars, ăm Việt Nam mơ-eăm tâk a tôp 10 – 15 kong têa cheăng kâ ki ai túa pơkâ ‘na tê mơdró kân má môi tung lâp plâi tơnêi.

Katarina Nga tơplôu ƀă tơbleăng