Kơxo hâi lơ 29/6, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hôp tơpui tơdroăng mơjiâng luât khế 6/2023. Tiô tơdroăng dêi rôh hôp mê, Chin phuh séa ngăn, ăm ‘nâi ‘na 4 tơdroăng pâ thế mơjiâng luât: Pâ thế mơjiâng luât ‘na Hnê hriâm; Tơdroăng tơkêa luât ‘măn rak (‘mâi hơ’lêh) Pơkâ athế mơjiâng luât ‘mâi hơ’lêh, tơ’nôm mâu tơdroăng luât Trếo pơkeăng; ‘Na mơjiâng tơdroăng tơkêa bro Luât ‘mâi hơ’lêh, tơ’nôm mâu luât pơkâ ki tơdjâk troh ‘no liăn cheăng, liăn ngân vâ tah ki xơpá, tơvâ tơvân dêi mâu tơdroăng tơkêa bro ‘no liăn  mơjiâng tơmeăm khoăng tơnêi têa.

Tơbleăng a rôh hôp, Ngế pro xiâm hnê ngăn  Chin phuh ăm ‘nâi, pêi 1 tung 3 tơdroăng ki tơƀrê, sap hơnăm 2022 troh nôkố, Chin phuh pơtối hnê pêi rêm khế ai môi rôh hôp mơjiâng luât. Tung mê, tơkŭm tah ki xơpá, tơvâ tơvân tơdjâk troh luât; tối nhên hnoăng cheăng dêi mơngế pơkuâ xiâm ƀă tơkŭm mơjiâng luât pơkâ pêi.

Rôh hôp má 6, Kuô̆k hô̆i hneăng 15 a khế 10 la ngiâ Chin phuh kô pơtroh ăm Kuô̆k hô̆i tơbleăng 9 tơdroăng tơkêa luât, ăm hnê tối 8 tơdroăng tơkêa Luât, tung mê ai hên luât ki pá,  ai hên tơdroăng hlê pơrá phá dêi rơpó. Xua mê, Ngế pro xiâm hnê ngăn tơnêi têa pơkâ thế tơkŭm hbrâ nhên khât, rak tơniăn tiô tơdroăng pơkâ, pêi tơbrê tro tiô luât, mâu luât pơkâ, tah ki xơpá tơvâ tơvân; po troăng ki nếo mơhno xiâm ăm tơdroăng mơnhông mơdêk