Xông tơpui hnê mơhno, Ngế pro xiâm hnê ngăn tơnêi têa tối nhên, sap ing mơjiâng Khu hnê mơhno, tơdroăng pêi pro mâu tơdroăng tơkêa bro troăng rơxế lơtreng ai hlo châ tơƀrê, tơniăn tâi tâng ƀă châ tơƀrê hên tâ. Ngế pro xiâm hnê ngăn tơnêi têa pơkâ mâu khu xiâm, kơvâ cheăng, kong pơlê mơnhông hiâm mơno pôu râng hnoăng cheăng, khên tơmiât, khên pêi, tơkŭm tah lôi tơvâ tơvân vâ mơnhông cheăng kơmăi troăng rơxế lơtreng.

Ƀă troăng kân ăm phêp rơxế kơtâu têi Lào Cai – Hà Nội – Hải Phòng kal pêi pro rĕng tơdroăng pêi pro tơdroăng tơkêa bro tơ’nôm ki ê, pêi kêi đeăng tơbleăng hriăn plĕng chiâng pêi pro, mơdêk troăng pêi tơdjêp troăng meăm rơxế lơtreng, mơjiâng pro kông tơkâ hluâ tơkăng kong ƀă pêi pro tro tơdroăng chêl thiê̆n, vêh xĕn kuăn pơlê rêh ối.

Ƀă troăng kân ăm phêp rơxế kơtâu têi Peăng Kơnhŏng – Peăng Hdroh ƀă mâu troăng kân tíu kơdrâm kuăn pơlê rêh ối tê mơdró a Hà Nội, Pơlê kong kân Hồ Chí Minh rơtế ƀă mâu troăng tơdjêp kơpong, Ngế pro xiâm hnê ngăn tơnêi têa pơkâ mơjiâng pơkâ pêi inhên, pơkâ troăng pêi mơdêk tơdroăng mơjiâng pro, tơniăn ki chiâng pêi pro ƀă tơdâng tơ’mô.