Hâi lơ 18/6, pôa Phạm Minh Chính, Ngế pro xiâm hnê ngăn tơnêi têa tối tơbleăng pơxiâm pro 3 tơdroăng tơkêa pro troăng prôk ki xiâm, mê cho: troăng Pakĭng 3  Pơlê kong kân Hồ Chí Minh, troăng kân tơdrăng lĕm Biên Hòa - Vũng Tàu ƀă troăng kân tơdrăng lĕm Khánh Hòa - Ƀuôn Ma Thuột. Kố cho 3 tơdroăng tơkêa pro ki kal dêi tơnêi têa ‘na kơvâ troăng prôk ƀă tâi tâng ki xŏn dêi 3 to troăng ai 247km; tâi tâng kơxô̆ liăn ‘no mơjiâng pro 3 tơdroăng tơkêa bro lối 115 rơpâu rơtal liăn.

Ngế pro xiâm hnê ngăn tơnêi têa xuân pơkâ thế mâu khu xiâm kơvâ cheăng ki tơdjâk troh dêi Tíu xiâm rơtế tơrŭm ƀă Khu xiâm ngăn troăng prôk, Vi ƀan 7 kong pơlê, pơlê kong kân ki châ pơcháu pêi pơtối pro tơ’lêi hlâu, teăm tơdrêng tah ki xơpá tơvâ tơvân, vâ tơniăn tung tơdroăng pêi pro, vâ Khu rak ngăn tơdroăng tơkêa bro ƀă khu ‘no liăn mơjiâng pro tơdroăng Tơkêa bro tơniăn ‘na pêi pro, tơƀrê.

Chin phuh kô đi đo tơmâng khât hnê mơhno pêi kơtăng vâ pêi rĕng klêi 03 tơdroăng tơkêa bro mê xuân môi tiah mâu tơdroăng tơkêa bro ‘no liăn mơjiâng pro tơmeăm khoăng ki ê pêi tro tiô pơkâ, pêi tơƀrê lĕm; ai tiô púi vâ mơnhông cheăng kâ - rêh ối, mơnhông tơdroăng rêh ối dêi kuăn pơlê.

Xuân tung hâi lơ 18/6, pôa Phạm Minh Chính veăng leh hiăng pro klêi 2 tơdroăng tơkêa bro troăng kân tơdrăng lĕm pơla Nha Trang - Cam Lâm ƀă Sap Vĩnh Hảo - Phan Thiết.