VOV4.Xơ Đăng - Kơxê lơ 6/9, pôa Phạm Minh Chính, Ngế pro xiâm hnê ngăn tơnêi têa tơdah pôa Khuong Sreng, Kăn hnê ngăn Đảng ƀô̆ Đảng Kuăn pơlê Kul  pơlê kong xiâm Pnom Penh kong têa Kul dế lăm pôu, pêi cheăng a Pơlê kong xiâm Hà Nội ƀă Pơlê kong kân Hồ Chí Minh. A rôh tơdah, pôa Phạm Minh Chính khĕn kơdeăn hdrối kô hía nah, tơrŭm cheăng pơla péa tơnêi têa châ mơnhông tơniăn; kăn pơkuâ péa tơnêi têa pơtối rak vế ki trâm mâ, tơpui tơno đi đo, malối cho rôh trâm mâ tơrá pơla pôa Nguyễn Phú Trọng, Kăn xiâm pơkuâ hnê ngăn Đảng, Kăn xiâm hnê ngăn Đảng Kuăn pơlê Kul, Ngế pro xiâm hnê ngăn Chin phuh Kul, pôa Hun Sen ƀă Kăn xiâm pơkuâ hnê ngăn Đảng, Kăn hnê ngăn tơnêi têa Lếo Thongloun Sisoulith.

Pôa Phạm Minh Chính, Ngế pro xiâm hnê ngăn tơnêi têa tơdah Kăn hnê ngăn Đảng ƀô̆ Đảng kuăn pơlê Phnom Penh

Mâu luât pơkâ tơrŭm cheăng pơla péa pâ pơtối rak vế pêi tơ-brê. Ngế pro xiâm hnê ngăn  tơnêi têa pâ athế péa pâ pơtối rơtế tơrŭm mơdêk tơrŭm tơ-brê tung mâu tơdroăng cheăng; kring vế tơniăn ƀă mơjiâng troăng tơkăng kong hơniâp, tơrŭm, tơrôa ƀă mơnhông tơ-brê, mơdêk cheăng kâ a tíu tê mơdró tơkăng kong; pro tơ’lêi hlâu ăm mâu khu mơdró péa tơnêi têa ‘no liăn cheăng, tơrŭm tung pêi cheăng kâ tê mơdró; mơdêk hnê hriâm ƀă hnê mơjiâng tuăn ngôa rơkê, trâm tơpui tơno mơhno túa lĕm tro, ôm hyô. 

Gương tơplôu ƀă tơbleăng