Péa pâ mơnhên tối khât mâu tơdroăng ki hiăng pêi pro ƀlêi chiâng klêi kơ’nâi 10 hơnăm kĭ tơkêa ƀă tơbleăng Tơkêa Tê mơdró tơniăn krê pơla Việt Nam ƀă EAEU, veăng gum mơdêk tê mơdró, po rơdâ kơchơ ƀă pro ivá tơniăn krê ăm tơrŭm cheăng ‘no liăn pêi cheăng.

Ngế pro xiâm hnê ngăn tơnêi têa tối nhên kal pơtối tí tăng ki tơhluâ tâ tiô tơdroăng tơkêa, thăm mơnhông tơrŭm cheăng Việt Nam – EAEU ƀă mâu tơdroăng cheăng, tơdroăng tơkêa bro tơrŭm cheăng; lôu péa kơchơ ki ó rơdêi tâ, mơdêk mâu tơdroăng ki rơdêi tơ’nôm ăm dêi rơpó.

Ngế pro xiâm hnê ngăn tơnêi têa pơkâ thế mâu kong têa tơrŭm cheăng EAEU pơtối tơbleăng pêi tơƀrê mâu troăng hơlâ tơrŭm cheăng, teăm tŏng gum, lêi tah mâu tơdroăng ki tơvâ tơvân; po rơdâ roê ‘mot mâu kế tơmeăm tung tơnêi têa cho mâu kế tơmeăm pêi lo ing chiâk deăng, ká xi xŏng, điê̆n tưh ƀă tơmeăm ki ai pơxúa rơdêi dêi Việt Nam. Péa pâ môi tuăn mơdêk tơrŭm tung tơdroăng tơrŭm, gum dêi rơpó ki rơkê plĕng, veăng pôu râng mâu tơdroăng ki ôh tá mơhúa, tơmiât troh mơjiâng krá tơniăn ƀă ton xŏn.