VOV4.Xơ Đăng - Kơxê lơ 7/10, pôa Phạm Minh Chính, Ngế pro xiâm hnê ngăn Chin phuh tơdah pôa ông Park Noh Wan, Kăn teăng mâ Hàn Quốc a Việt Nam troh koh pơlâng drêng mơgêi dêi hneăng cheăng a Việt Nam.

Ngế pro xiâm hnê ngăn tơnêi têa mơnhên tối khât tơdroăng ki Kăn teăng mâ hiăng veăng tŏng kum tung tơdroăng mơdêk tơrŭm cheăng kâ pơla Việt Nam ƀă Hàn Quốc, malối cho tŏng kum tơdjêp tơrŭm pơla mâu kong pơlê Việt Nam ƀă mâu khu mơdró kâ, kong pơlê dêi Hàn Quốc; tơrŭm tơkŭm po ƀlêi chiâng mâu rôh tơpui tơno pơla Ngế pro xiâm hnê ngăn Chin phuh ƀă mâu khu mơdró kâ Hàn Quốc tŏng kum mâu tơdroăng ki xơpá, tơvâ tơvân, veăng kum rĕng pêi klêi mâu tơdroăng pơkâ kơxô̆ liăn pêi lo ing tê mơdró pơla péa pâ châ a kơlo 100 rơtal dollars a hơnăm 2023 ƀă 150 rơtal a hơnăm 2030.

Pôa Phạm Minh Chính, Ngế pro xiâm hnê ngăn Chin phuh tơdah Kăn teăng mâ Hàn Quốc koh pơlâng

Pôa Phạm Minh Chính tối nhên, Việt Nam đi đo ngăn nhuô̆m tơrŭm cheăng ƀă Hàn Quốc ƀă rơhêng vâ mơdêk tơrŭm ó rơdêi ƀă khât tâ nếo pơla péa tơnêi têa.

VOV/Tơplôu: Katarina Nga