Drêng veăng Hôp mâu kăn xiâm mâu Khu kong têa cheăng tơ ƀrê G7 po rơdâ ƀă pêi cheăng a Nhuk, kơxê hâi lơ 19/5, a Hiroshima,  pôa Phạm Minh Chính, Ngế pro xiâm hnê ngăn Chin phuh hiăng veăng leh tơbleăng troăng tơƀai kơneăng tơdrăng ki apoăng pơla Việt Nam ƀă Hiroshima ƀă troăng tơƀai má 8 tơdjêp ƀă péa tơnêi têa dêi Khu tơbai Vietjet.  Troăng  tơƀai kơneăng sap Hà Nội troh Hiroshima pơxiâm chơ tơmối sap hâi lơ 19/7/2023 ƀă ai 2 rôh kơneăng prôk vêh rêm măng tĭng a mâu hâi Pái ƀă hâi Tĭng.

Tiah mê, nôkố Vietjet ai mâu troăng tơƀai kơneăng tơdrăng sap Hà Nôị, pơlê kong kân Hồ Chí Minh troh Tokyo, Osaka, Nagoya, Fukuoka ƀă hên rôh kơneăng troh a Niigata, Shizuoka, Fukushima. Ing mê, Vietjet mơdêk rôh tơƀai kơneăng sap Viẹt Nam troh a Nhuk tâk 58 rôh kơneăng prôk vêh tung môi măng tĭng. Mâu troăng tơƀai kơneăng tơdrăng ki nếo dêi Vietjet, tơngah tơdroăng tơrŭm cheăng pơla Hiroshima ƀă Việt Nam kố tơƀrê tâ nếo tung hên tơdroăng cheăng, tá tơdroăng mơdró kâ ƀă ôm hyô.