VOV4.Xơ Đăng - Kơxê lơ 3/10, pôa Phạm Minh Chính, Ngế pro xiâm hnê ngăn tơnêi têa tơdah jâ Era Dabla-Norris, Ngế pơkuâ séa ngăn dêi Liăn ‘măn kơdĭng lâp plâi tơnêi (IMF) ‘na cheăng kâ ƀă liăn ngân, liăn dêi mâu kong têa tung khu dế ai rôh lăm pôu ƀă pêi cheăng a Việt Nam. Ngế pro xiâm hnê ngăn tơnêi têa mơnê mâu tơdroăng veăng kum kơnâ ki IMF hiăng ‘măn ăm Việt Nam ing mâu hơnăm apoăng mơnhông mơdêk troh nôkố, tung pơla achê kố tơdroăng hnê tối ‘na luât, tŏng kum ‘na kih thuât ƀa hnê mơngế cheăng, malối cho mâu tơdroăng tối tơbleăng nhên, tối khât ƀă pâ thế mâu tơdroăng rak ngăn ‘na cheăng kâ rêh ối tung pơla dế ai pơreăng COVID-19.

Tơpui tơno ‘na tơdroăng cheăng kâ Việt Nam, Ngế pro xiâm hnê ngăn tơnêi têa ăm ‘nâi, tơdrêng ƀă tơdroăng pơtối séa ngăn pơreăng COVID-19, tơdroăng cheăng kâ Việt Nam nôkố pơtối tơniăn ƀă ‘mâi mơnhông nếo. Tơdroăng pơkuâ dêi Chin phuh Việt Nam dế châ pêi pro hbrâ rơnáu, krá khât, ƀeăn rơkê, teăm tơdrêng, Ngế pro xiâm hnê ngăn tơnêi têa pâ thế IMF kum Việt Nam cho môi tơnêi têa dế mơnhông; mơdêk hnê ‘na luât ăm Chin phuh ƀă mâu kơ koan tơrŭm cheăng ‘na tơdroăng pơkuâ cheăng kâ, hbrâ ví ƀă tơdroăng ki ôh tá mơhúa nôkố; pơtối hnê tơdroăng cheăng pêi, kum kih thuât ăm mâu kơvâ cheăng rak ngăn ‘na cheăng kâ; mơ-eăm veăng kum Việt Nam mơnhông cheăng kâ krúa, hmâ ƀă hyôh kong prâi ƀă pơ’lêh kơxô̆ ƀă hía hé.

VOV Tây Nguyên/Tơplôu: Gương