Kơxo hâi lơ 28/6, pơtối lăm pôu kong têa Sinuâ, pôa Phạm Minh Chính, Ngế pro xiâm hnê ngăn tơnêi têa tơdah mâu kăn tơrŭm cheăng Sinuâ  xua pôa Viên Mẫn Đạo, Ngế xiâm phŏ ngăn Khu kăn Tơrŭm cheăng tơpui kâ dêi kuăn pơlê Sinuâ pơkuâ djâ mâu kăn. A rôh trâm mâ, mâu kăn tơrŭm cheăng Sinuâ hiăng rơ-rêk  hlối lo têa mâ tơbâ mâu tơdroăng ton nah ki ôh tá la lâi kâi piu kơ Pôa Hồ Chí Minh, Kăn xiâm hnê ngăn tơnêi têa ki apoăng, ƀă tơnêi têa ƀă kuăn mơngế Việt Nam.

Jâ Trần Tri Tiến, kuăn kơdrâi kăn tươ̆ng Trần Canh tối nhên, tơdroăng tơrŭm cheăng pơla péa tơnêi têa hiăng hmâ pêi cheăng ing ton nah, rơ-rêk tung hiâm mơno hơ’muăn tơbâ tơdroăng ton nah dêi kăn tươ̆ng Trần Canh ƀă Việt Nam, ƀă Pôa Hồ.  Pâ dêi jâ châ Tíu xiâm Đảng kŏng sản Sinuâ rah xo lăm veăng kum Việt Nam ƀă Pôa Hồ cho ngế ki nhoăm má môi; tơmiât troh mâu hâi khế hơnăm châ trâm Pôa Hồ cho mâu hâi ki lĕm má môi dêi pâ jâ.

Jâ púi vâ tơdroăng tơrŭm krá khât xua mâu kăn pơkuâ hdrối nah dêi péa tơnêi têa thăm mơhnhôk tơrŭm đi đo krá kak. Teăng mâ Kăn xiâm Đảng, Tơnêi têa, Ngế pro xiâm hnê ngăn tơnêi tea pơtroh rơkong rơkâu ivá, rơkâu mâu meh miê, mâu ngoh nâ đi đo  ai ivá mo sêi, hơniâp ro tung rêh ối, pơtối mơjiâng ƀă mơhnhôk tơrŭm krá pơla Việt Nam- Sinuâ.