Pôa Phạm Minh Chính, Ngế pro xiâm hnê ngăn tơnêi têa hiăng ai rôh tơdah Đăi tươ̆ng Vilay Lakhamphong, Ngế cheăng tung khu xiâm kal kí, Ngế pro xiâm phŏ, Ngế xiâm Kŏng an kong têa Lếo hiăng pơkuâ djâ Khu kăn xiâm Kŏng an Lếo lăm pôu, pêi cheăng a Việt Nam, veăng hôp mơgêi tơdroăng cheăng tiô Pơkâ tơrŭm cheăng hơnăm 2022 ƀă hôp tơpui pơla péa pâ to khu Ngế xiâm pơla Khu xiâm Kŏng an péa tơnêi têa Việt Nam - Lếo ‘na tơrŭm cheăng, hbrâ mơdât ma tŭi. 

Pôa Phạm Minh Chính, Ngế pro xiâm hnê ngăn tơnêi têa tơdah Đăi tươ̆ng Vilay Lakhamphong, Ngế pro xiâm phŏ hnê ngăn tơnêi têa, Ngế xiâm pơkuâ kŏng an Lếo

A rôh tơdah, Ngế pro xiâm hnê ngăn tơnêi têa tối nhên, péa tơnêi têa kal mơdêk tơrŭm, môi tuăn, tơrŭm nhên, pêi cheăng tơƀrê tâ nếo, kum rêm tơnêi têa mơjiâng mơnhông cheăng kâ tơniăn, pơkuâ dêi rế tơƀrê. Tơdroăng cheăng lêng - kring tơniăn cho môi tơdroăng ki kal tung tơrŭm pơla péa tơnêi têa.

Ngế pro xiâm hnê ngăn tơnêi têa pâ thế péa pâ pơtối mơdêk, pơtối rak tâ nếo hnoăng pêi ki lĕm tro tung pơla vâ kring vế tơniăn tơnêi têa, kring tơniăn pơlê pơla dêi péa tơnêi têa, tung mê ai kring tơniăn tung măng Internet, rak tơniăn ‘na kế kâ, tơniăn on tơhrik tung tŭm tơdroăng, malối tung pơla ai hên tơdroăng xơpá pơloăng mơnúa tiah dế nôkố.