Kơxê măng lơ 16/5, pôa Phạm Minh Chính, Ngế pro xiâm hnê ngăn Chin phuh tơdah pôa Alberto Álvarez Casas, Ngế xiâm ngăn Kăn sat kong têa Cuba ƀă Khu râ kăn xiâm dêi Khu xiâm pơkuâ ngăn Kăn sat Cuba dế pôu pêi cheăng a Việt Nam. Pôa Phạm Minh Chính, Ngế pro xiâm hnê ngăn tơnêi têa mơnhên tối khât, rôh lăm pôu kố mơnhên tơdroăng ki tối nhên tơdroăng khŏm mơeăm ‘mâi mơnhông ƀă mơdêk tung tâi tâng, ai pơxúa tơrŭm cheăng khôi hmâ, tơrŭm tơroâ ƀă tơrŭm tung hên kơvâ cheăng pơla péa tơnêi têa Việt Nam ƀă Cuba.

Ngế pro xiâm hnê ngăn tơnêi têa rơkâu Cuba hiăng tơkŭm po rôh tâ phĭu rah xo kăn pơkuâ ƀlêi trâng. Việt Nam veăng hơlêm mâu tơdroăng ki xơpá ki Cuba dế trâm, Việt Nam đi đo môi tuăn ƀă Cuba tung mâu kơvâ cheăng, kô pơtối tŏng kum Cuba mâu tơdroăng klâi ki tro má môi tâng chiâng, pêi tâi ivá vâ tŏng kum Cuba tung ivá ki hbrâ rơnáu tối tơbleăng ki rơkê plĕng, tung mê, ai kơvâ pei chiâk deăng, mơdêk ivá mơjiâng bro ƀă rak tơniăn bê tŭm kế kâ, păn ká xi xŏng ƀă hên ki ê.

Ngế pro xiâm hnê ngăn Chin phuh rơhêng vâ péa pâ mơdêk tơrŭm cheăng rế hía rế krá rơdêi; pơkâ thế péa pâ pơtối rak vế tơpui tơno; mơdêk tơƀrê tơrŭm cheăng pơla péa pâ ing mâu tơdroăng pơkâ Hneăng hôp tơpui tơno pơla péa Đảng, Vi ƀan tơrŭm Chin phuh ‘na tơrŭm cheăng kâ ƀă khoa hok – kong ngê̆, Tơpui tơno troăng hơlâ tŏng kum gâk kring pơlê pơla.