Kơxê hâi lơ 3/7, pôa Phạm Minh Chính, Ngế pro xiâm hnê ngăn Chin phuh hiăng tơdah jâ Armida Salsiah Alisjahbana, Kăn xiâm phŏ chêh tôm xo rơkong khu lâp kong têa lăm pôu păng ‘nâng Việt Nam. Pôa Phạm Minh Chính, Ngế pro xiâm hnê ngăn Chin phuh tối nhên, Việt Nam ngăn nhuô̆m hnoăng cheăng dêi Khu lâp kong têa tung mơdêk tơrŭm tung hên kơvâ cheăng vâ pơkâ tơleăng mâu tơdroăng ki dế trâm tung lâp plâi tơnêi.

Ngế pro xiâm hnê ngăn Chin phuh ăm ‘nâi, Việt Nam dế mơjiâng, mơnhông tơnêi têa ngăn tung 3 tơdroăng ki xiâm cho mơjiâng Tơnêi têa tiô hnoăng luât xah hô̆i chuh ngiah, tơdroăng tơniăn krê xah hô̆i chuh ngiah ƀă tơdroăng kơchơ mơdró pơkâ tơmiât xah hô̆i chuh ngiah; mơdêk 3 tơdroăng ki xiâm kố tung la ngiâ ƀă troăng hơlâ tŏng kum, mâu ngế cheăng ƀă hngêi trăng troăng klông.

Kăn xiâm phŏ chêh tôm xo rơkong khu lâp kong têa mơnhên tối krâu khât mâu tơdroăng ki kal Việt Nam hiăng pêi pro klêi tung mơnhông cheăng kâ rêh ối pơlê pơla ƀă ‘mâi mơnhông klêi kơ’nâi ai pơreăng COVID-19 tiô troăng krá tơniăn. ‘Na tơdroăng, tung pơla kong têa nôkố, péa pâ tối ‘na ki tô tuăn ƀă ki tơdjâk dêi mâu tơdroăng pơloăng mơnúa tung lâp plâi tơnêi môi tiah mâu rôh tơxul tơxal, tơdroăng kong prâi pro hơ’lêh, kế tơmeăm to kơnâ.