A rôh tơpui tơno, Kăn xiâm hnê ngăn Kuô̆k hô̆i râ má péa Tơnêi têa Rusi tối rơdêi hbrâ rơnáu tơrŭm cheăng ƀă Việt Nam, tơbleăng mâu tơdroăng tơkêa khu râ kăn xiâm, ăm tơrŭm cheăng la ngiâ tŭm têk Việt Nam – Rusi rế hía rế mot trâu hngế, ai pơxúa ƀă tơƀrê.

A rôh trâm, péa pâ tối rơdêi hâi khế tơrŭm cheăng pơla péa Kuô̆k hô̆i mơnhông tơniăn lĕm; Kuô̆k hô̆i péa tơnêi têa hiăng tơrŭm krá tơniăn, tơrŭm tơƀrê tá tung pơla péa pâ ƀă hên kơvâ, tơbleăng pêi tơƀrê mâu rôh tơrŭm cheăng dế ai pơla péa tơnêi têa, malối cho tơkŭm po mâu rôh hôp dêi Vi ƀan tơrŭm cheăng Kuô̆k hô̆i.

Péa pâ loi tiah kố, Kuô̆k hô̆i péa pâ kô pơtối pro tơ’lêi hlâu vâ tơbleăng mâu tơdroăng tơkêa pơla kăn xiâm pơkuâ péa tơnêi têa; loi mâu kơ koan mơjiâng luât péa tơnêi têa tung hneăng ki nếo kô đi đo tơrŭm achê, rơtế prôk ƀă, kơ koan péa tơnêi têa veăng pêi ai pơxúa tung tơdroăng ki mơdêk tơrŭm cheăng Việt Nam – Rusi tung chal tơrŭm cheăng nếo.