A rôh tơpui tơno, pôa Phạm Minh Chính, Ngế pro xiâm hnê ngăn tơnêi têa tối nhên ki kal dêi tơdroăng mơdêk tơrŭm cheăng kâ, tơdroăng ki kal xiâm dêi tơrŭm pơla péa tơnêi têa, thăm mơdêk tơrŭm cheăng kâ, tơhrâ rak vế gâk kring cheăng kâ; mơdêk tơdroăng pêi pro mâu tơdroăng tơkêa tơrŭm cheăng ki kal; tơhrâ pơtối pro tơ’lêi hlâu ăm lối 2 rơpâu khu mơdró kâ Nhuk tơrŭm ‘no liăn cheăng ƀă tê mơdró rơtế ai pơxúa a Việt Nam.

Ngế pro xiâm hnê ngăn kong têa Nhuk séa ngăn tŏng gum ăm Việt Nam mâu kơxô̆ liăn mung ODA nếo ăm mâu tơdroăng tơkêa mơjiâng pro tơdroăng cheăng tung la ngiâ, troăng rơxế lơ treng tung kơphô̆, troăng rơxế lơ treng kơtâu tơdrăng. Ngế pro xiâm hnê ngăn xuân pơkâ mơ’no po rơdâ tơrŭm cheăng tung mâu kơvâ cheăng ki nếo môi tiah pơhlêh kơxô̆, tuăn ngoâ mơjiâng pro; pêi trâu hngế tâ tơrŭm pêi cheăng, hnê cheăng mâu ngế pêi cheăng; mơdêk tơrŭm kong pơlê, trâm mâ kuăn pơlê péa tơnêi têa; rơhêng vâ Nhuk pơtối ai mâu troăng hơlâ tŏng gum mơhnhôk, tŏng gum mơngế Việt Nam a Nhuk.