Pôa Phạm Minh Chính, Ngế pro xiâm hnê ngăn Chin phuh tối ăm kăn xiâm phŏ pơkuâ hlối cho Ngế pro xiâm hnê ngăn UAE ‘na mâu tơdroăng ki pêi tơƀrê kal dêi Việt Nam, malối cho tung mâu kơvâ cheăng kâ. Klêi tơpui tơno, péa ngăn kăn pơkuâ hiăng châ hlo leh kĭ tơkêa kong têa tơrŭm cheăng kâ Tŭm têk, tơkêa tê mơdró tơniăn krê apoăng dêi Việt Nam ƀă môi kong têa Arab.

Kố xuân cho tơkêa tê mơdró tơniăn krê a hâi khế tơpui tơno rĕng má môi dêi Việt Nam, mơhno tơdroăng ki khŏm mơ-eăm khât dêi kăn pơkuâ xuân môi tiah khu xiâm, kơvâ cheăng dêi péa tơnêi têa vâ pro mơnhông tơrŭm cheăng kâ, tê mơdró, ‘no liăn cheăng pơla péa tơnêi têa, po troăng kân, ai pơxúa ăm Việt Nam châ mot trâu hngế tung kơchơ tê mơdró Trung Đông. Ƀă mâu tơdroăng ki kal tơpui tơno tŭm têk, tơkêa kố tơhrâ ko pro pơxúa tơdâng ăm tá péa tơnêi têa.