Péa Ngế pro xiâm hnê ngăn tơnêi têa hơniâp ro hlo tơdroăng ki mơnhông rơdêi tung tơrŭm cheăng pơla péa pâ. Singapore rak vế tíu ối ‘no liăn má 2 lâp plâi tơnêi a Việt Nam; tơ’nôm 2 kơpong cheăng ƀă kơmăi kơmok Việt Nam – Singapore châ hbru ăm troăng hơlâ môi tuăn ‘no liăn, pro chiâng tíu 20 kơpong VSIP a 14 to kong pơlê, pơlê kong kân Việt Nam, kơxô̆ liăn châ xo ing tê mơdró tâk tơniăn, châ 10,3 rơtal dollars hơnăm 2024. Việt Nam chiâng tơnêi têa tê phái hên má môi a Singapore.

Péa ngế pro xiâm hnê ngăn tơnêi têa môi tuăn ‘na mâu troăng pơkâ, teăm tơdrêng vâ thăm mơnhông loi tơngah ‘na tơdroăng kal kí, pro chiâng ivá mơnhông tơƀrê nếo ăm tơrŭm cheăng kong têa tơrŭm tung la ngiâ tŭm têk; ki hdrối tâ cho pêi pro klêi mâu tơdroăng pêi tơƀrê Tơdroăng tơbleăng tơrŭm cheăng nếo pơla hơnăm 2025 – 2030. Péa Ngế pro xiâm hnê ngăn tơnêi têa môi tuăn kal thăm mơnhông pơtroh khu râ kăn, trâm mâ khu râ kăn ƀă rêm râ; tơbleăng tơƀrê mâu troăng tŏng gum tơrŭm cheăng pơla péa tơnêi têa, malối cho troăng ki hôp tiah hmâ pơla Ngế pro xiâm hnê ngăn péa tơnêi têa.