VOV4.Xơ Đăng - Kơxo lơ 13/10, a Pơlê kong kân Cần Thơ, pôa Phạm Minh Chính, Ngế pro xiâm hnê ngăn tơnêi têa ƀă mâu kăn Kuô̆k hô̆i dêi khu kăn Kuô̆k hô̆i pơlê kong kân Cần Thơ trâm mâ kuăn pơlê hdrối roh hôp má pŭn, Kuô̆k hô̆i hneăng 15.

Pôa Phạm Minh Chính, Ngế pro xiâm hnê ngăn tơnêi têa trâm mâ kuăn pơlê a Pơlê kong kân Hồ Chí Minh hdrối hôp roh má pŭn

A rôh trâm mâ kuăn pơlê, kuăn pơlê kong kân Cần Thơ tối hâk mơnê hlo tơdroăng cheăng kâ rêh ối dêi tơnêi têa 9 khế hdrối hiăng pêi châ tơƀrê hên tơdroăng ki kal tung hên kơvâ cheăng; púi vâ ƀă pâ thế Kuô̆k hô̆i, Chin phuh pơtối mâu tơdroăng troăng rơhlâ vâ pơtối rak vế tơdroăng ki tro, tah ki xơpá, pơloăng mơnúa nôkố môi tiah púi vâ nôkố tung tơdroăng tê rôe pơkeăng, tơmeăm xúa tung khăm pơlât, ‘no liăn cheăng khăm pơlât, luât pơkâ tŏng kum ‘mâi hơ’lêh liăn khế, tơdroăng mơnhông cheăng kâ pêi chiâk...

Klêi tâng tơdroăng kuăn pơlê tối, pâ thế, pôa Phạm Minh Chính, Ngế pro xiâm hnê ngăn tơnêi têa tối ăm kuăn pơlê mâu tơdroăng ki kal ‘na cheăng kâ ki hiăng pêi hlo tơƀrê tung 9 khế apoăng hơnăm, hlối tối nhên mâu tơdroăng ki u ối, ki xơpá. Ngế pro xiâm hnê ngăn tơnêi têa pâ thế mâu kơvâ cheăng rêm râ, mâu kong pơlê pơtối pêi tơƀrê mâu tơdroăng cheăng, troăng rơhlâ pơkâ tung mâu tơdroăng cheăng, tung mê tơmâng tơdroăng hbrâ mơdât COVID-19, rak tơniăn ‘na tơdroăng tê mơdró, yă tê mâu tơmeăm ăm pêi chiâk deăng, tơdroăng rêh ối malối rôh Têt ƀă apoăng hơnăm 2023, xua tro rôh tơdroăng tê mơdró kong têa ê tung roh mot hơnăm nếo.

VOV/Tơplôu: Gương