Klêi kơ’nâi troh a pơlê kong xiâm Bắc Kinh, pơxiâm lăm pôu pêi cheăng kong têa Sinuâ ƀă veăng Hneăng hôp rêm hơnăm mâu khu ki djâ troăng apoăng roh má 14 dêi Hneăng hôp tơpui tơno Cheăng kâ lâp plâi tơnêi (WEF), pôa Phạm Minh Chính, Ngế pro xiâm hnê ngăn tơnêi têa trâm mâ kăn ƀô̆ mâu kơ koan teăng mâ ƀă mơngế Việt Nam a kong têa Sinuâ.

Xông tơpui a roh trâm mâ, pôa Phạm Minh Chính tối nhên, Đảng ƀă Tơnêi têa pin đi đo nhuô̆m mơngế Việt Nam a kong têa ê, tung mê, ai mơngế Việt Nam rêh ối pêi cheăng a kong têa Sinuâ, cho khu ki ôh tá păng klâ dêi khu rŭm môi tuăn tâi tâng hdroâng mơngế, cho môi tung mâu tơdroăng ki mơhnhôk, xiâm kối ivá ó rơdêi mơnhông mơdêk dêi tơnêi têa.

Tung la ngiâ, Ngế pro xiâm hnê ngăn tơnêi têa pói vâ mơngế Việt Nam a Sinuâ pơtối mơnhông hiâm mơno tŏng kum dêi pó, mơdêk hiâm mơno hâk tơngăm hdroâng mơngế, hiâm mơno rŭm môi tuăn, tŏng kum dêi pó tơkâ hluâ pá puât; mơ-eăm xông tơtêk, thăm tơrŭm cheăng, pêi tiô luât ƀă veăng kum ăm mơnhông mơdêk a tơnêi têa nôkố; cho kông tơdjêp ki kal ăm tơrŭm tiô khôi vâi krâ nah nhŏng o ƀă Khu tơrŭm cheăng ton xŏn pơla Việt Nam ƀă Sinuâ.