A roh trâm mâ, pôa Phạm Minh Chính, Ngế pro xiâm hnê ngăn Chin phuh mơnhên, khôi túa rŭm môi tuăn, kum dêi pó pơla péa tơnêi têa Việt Nam – Kul cho tơmeăm ki kơnía, cho môi tung mâu tơdroăng ki kal ƀă tơdroăng tơplâ tơleăng lĕm hdroâng mơngế hdrối nah ƀă tơdroăng mơjiâng mơnhông dêi rêm kong têa kố. Péa Ngế pro xiâm hnê ngăn tơnêi têa phiu ro hdrối mâu tơdroăng mơnhông dêi tơrŭm cheăng tơnêi têa achê dêi pó lĕm tro, tơrŭm nhŏng o tiô khôi vâi krâ nah, tơrŭm tâi tâng, krá tơniăn ton xŏn pơla péa tơnêi têa tung pơla kố nah, phiu ro tơdroăng péa tơnêi têa rak đi đo mâu roh lăm pôu ƀă trâm mâ khu râ kăn xiâm.

-Pôa Phạm Minh Chính, Ngế pro xiâm hnê ngăn tơnêi têa trâm mâ péa pâ ƀă Ngế pro xiâm hnê ngăn kong têa Kul

Péa Ngế pro xiâm hnê ngăn tơnêi têa tối nhên ki kơnâ tơdroăng mơnhông dêi tơrŭm cheăng Việt Nam – Kul – Lếo; mơnhên pơtối rak mâu troăng tơrŭm cheăng pơla pái tơnêi têa a tâi tâng mâu ƀâng, xua pơxúa dêi kuăn pơlê pái tơnêi têa, xua hơniâp lĕm, tơniăn ƀă mơnhông a kơpong ƀă lâp plâi tơnêi.

Xuân tung po Roh hôp, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Lam Thiên Lập, Kăn hnê ngăn Kơpong pơkuâ xêh hdroâng kuăn ngo Choang Quảng Tây, Sinuâ, tơdah Kăn xiâm hnê ngăn Hngêi arak liăn châu Á, trâm Ngế pro xiâm hnê ngăn kong têa Lếo.