Hâi lơ 11/5, pôa Phạm Minh Chính, Ngế pro xiâm hnê ngăn Chin phuh hiăng trâm pôa Taur Matan, Ngế pro xiâm hnê ngăn kong têa Timor -Leste drêng rôh veăng Hôp mâu kăn xiâm ASEAN 42 a  Labuan Bajo, Indonesia. Pôa Phạm Minh Chính, Ngế pro xiâm hnê ngăn Chin phuh tối, ing tơrŭm cheăng tiah hmâ ƀă tơrŭm nhên khât, Việt Nam vâ tối mâu tơdroăng pêi pro, kơjo kum Timor-Leste  rĕng chiâng kong têa ki má 11 dêi rơpŏng hngêi ASEAN. péa pâ môi tuăn vâ mơdêk tơpui tơno râ Kăn xiâm ƀă rêm râ, tơbleăng pêi tơƀrê mâu tơdroăng tơhrâ hiăng kĭ; tơmâng xo ối hên tơmeăm khoăng tơ’lêi hlâu vâ tơrŭm cheăng, malối ‘na tê mơdró - ‘no liăn cheăng, ƀă môi tuăn pro tơ'lêi hlâu ăm khu mơdró péa tơnêi têa tê mơdró, pêi cheăng tơƀrê a tơnêi têa dêi rơpó.

Péa ngế pro xiâm hnê ngăn xuân vâ môi tuăn mơdêk tơrŭm mơhno túa lĕm tro, ôm hyô, hnê hriâm, trâm tơpui tơno ƀă kuăn pơlê vâ mơdêk ki tơrŭm; po rơdâ mâu tơdroăng cheăng ki nếo môi tiah pơ’lêh kơxô̆, mơdêk cheăng kâ ngiât, cheăng kâ tơƀrê.