Pôa Vladimir Putin, Kăn xiâm pơkuâ kong têa Rusi mơnhên, roh lăm pôu pêi cheăng dêi pôa Phạm Minh Chính, Ngế pro xiâm hnê ngăn tơnêi têa ai kơnía păng ‘nâng tung tơdroăng rak ƀă mơdêk tơrŭm cheăng pơla péa pâ. Tung tơdroăng tơrŭm cheăng, péa ngế kăn xiâm pơkuâ hiăng tối ăm dêi pó ‘na tơdroăng ƀă troăng prôk la ngiâ, troăng pêi cheăng ton xŏn tung mơnhông mơdêk cheăng kâ - rêh ối pơlê pơla dêi rêm tơnêi têa.

Tung pơla kố nah, ƀă tơdroăng mơ-eăm dêi Chin phuh péa tơnêi têa, mâu khu xiâm, kơvâ cheăng, kong pơlê ki tơdjâk, tơrŭm cheăng hên kơvâ cheăng pơla Việt Nam – kong têa Rusi dế mơnhông mơdêk lĕm tro. Ing mê, pôa Phạm Minh Chính, Ngế pro xiâm hnê ngăn tơnêi têa ƀă pôa Vladimir Putin, Kăn xiâm pơkuâ kong têa Rusi hiăng tơpui tơno trâu rơdâ ‘na tơdroăng kal vâ, tơmeăm ki ai hlâu dêi rêm tơnêi têa, mơnhên mâu kơvâ ki xiâm, troăng tơmiât la ngiâ kân tung tơrŭm cheăng pơla péa pâ tung la ngiâ, vâ pro trâu hơngế tâ tơrŭm cheăng Khu tơrŭm cheăng ton xŏn tâi tâng pơla Việt Nam – kong têa Rusi, ngăn kố cho kơjo ton xŏn dêi péa tơnêi têa.