Drêng rôh veăng Hôp mâu Kăn xiâm BRICS po rơdâ a Kazan, kong têa Rusi, pôa Phạm Minh Chính Ngế pro xiâm hnê ngăn tơnêi têa hiăng trâm pôa Tập Cận Bình, Kăn xiâm pơkuâ hnê ngăn Tíu xiâm Đảng Kŏng san Sinuâ, Kăn xiâm hnê ngăn Kŏng têa kŏng hòa nhân dân trung Hoa. A rôh trâm mâ, pôa Phạm Minh Chính, Ngế pro xiâm hnê ngăn tơnêi têa tối Việt Nam đi đo ngăn mơnhông tơrŭm cheăng ƀă Sinuâ cho troăng hơlâ ki tro má môi, pơkâ thế pêi tơdrăng rah xo troăng hơlâ pêi tơƀrê, pêi ahdrối  tung troăng hơlâ tơpui kâ dêi Việt Nam.

‘Na tơrŭm cheăng péa pâ pơla Việt Nam - Sinuâ, pôa Phạm Minh Chính, Ngế pro xiâm hnê ngăn tơnêi têa khĕn kơdeăn tơdroăng tơrŭm pơla péa Đảng, péa tơnêi têa tung hơnăm mê hía nah, ôh tá la lâi pơtê mơnhông tơƀrê, pơxiâm pêi mâu tơdroăng cheăng tung mâu hơnăm mơnhông tơƀrê ó tâ nếo ƀă tơdroăng pơkâ mơjiâng  Khu kuăn pơlê tối ăm dêi rơpó ‘nâi mâu tơdroăng tung la ngiâ pơla Việt Nam - Sinuâ ai pơxúa tiô troăng hơlâ pơkâ  “6 lối tâ” dêi Ngế pro xiâm hnê ngăn tơnêi têa pơkâ thế péa pâ pơtối mơdêk tơpui tơno, trâm mâ tơrá mâu kăn; mơdêk tơrŭm cheăng ki tơƀrê tung mâu kơvâ cheăng ăm trâu rơdâ tâ, tung mê, tơdjêp pro troăng prôk, malối pêi ahdrối tơbleăng 3 tơdroăng pro troăng rơxế lơ treng tô pơkâ tơdjêp pơla Việt Nam - Sinuâ , Lào Cai - Hà Nội -  Hải Phòng,  Lạng Sơn - Hà Nội, Móng Cái - Hạ Long - Hải Phòng)  vâ mơdêk tơdjêp  mơnhông cheăng kâ péa pâ.

Xuân tung mâu tơdroăng tơpui a hneăng hôp mâu kăn xiâm BRICS po rơdâ a Kazan, kong têa Rusi, Phạm Minh Chính, Ngế pro xiâm hnê ngăn tơnêi têa hiăng trâm kăn xiâm pơkuâ kong têa Kazakhstan, Kăn xiâm pơkuâ kong têa Turkmenistan ƀă ngế pro xiâm hnê ngăn kong têa  Ethiopia.