VOV4.Xơ Đăng - Kong măng lơ 30/8, Khu pơkuâ ngăn Đảng, Hô̆i đong hnê ngăn, Vi ƀan hnê ngăn, Vi ƀan Măt trâ̆n Tơnêi têa Việt Nam kong pơlê Bình Thuận tơkŭm po kân krip leh tơbâ 30 hơnăm hâi vêh mơjiâng kong pơlê (1992 - 2022) vâ hơ’muăn tối mâu rôh mơnhông mơdêk, tơbleăng tối mâu tơdroăng ki hiăng ai hlâu, mâu tơdroăng ki hiăng pêi pro klêi lối 30 hơnăm vêh mơjiâng kong pơlê. Troh veăng hôp ƀă tơpui a rôh leh, teăng mâ kăn pơkuâ Đảng, Tơnêi têa, pôa Phạm Minh Chính, Ngế pro xiâm hnê ngăn tơnêi têa rơkâu khĕn kơdeăn, mơnhên tối khât mâu ivá mơ-eăm ki Đảng ƀô̆, khu kăn pơkuâ khu lêng ƀă kuăn pơlê kong pơlê Bình Thuận hiăng pêi pro klêi tung plâ 30 hơnăm mơjiâng, hơ’lêh nếo ƀă mơnhông, veăng kum pêi pro pơxúa tung tơdroăng ki tơƀrê tơdjuôm dêi lâp tơnêi têa.

Pôa Phạm Minh Chính, Ngế pro xiâm hnê ngăn tơnêi têa veăng a leh tơbâ 30 hơnăm hâi vêh mơjiâng kong pơlê Bình Thuận

Tung la ngiâ ah, Ngế pro xiâm hnê ngăn tơnêi têa pơkâ thế, Đảng ƀô̆, khu kăn pơkuâ, khu lêng ƀă kuăn pơlê kong pơlê Bình Thuận kal pơtó mâu tơdroăng ki pêi pro tơƀrê, hiăng mơ-eăm athế mơ-eăm tâ nếo, hiăng tơrŭm athế rế tơrŭm tâ nếo, hiăng khŏm mơ-eăm mê athế khŏm mơ-eăm tâ nếo. Xo ivá cho ki xiâm, tơdroăng cheăng tung la ngiâ, ton xŏn, khŏm mơ-eăm; ivá cho ki kal veăng kum rơtế ƀă lâp tơnêi têa mơjiâng cheăng kâ tơniăn krê, ƀă mot tơrŭm cheăng ƀă kong têa ê, kal khât, tơƀrê tung tơdroăng nếo.

Katarina Nga tơplôu ƀă tơbleăng