Hơnăm 2022, Hngêi arak liăn Tơnêi têa hiăng châ tơƀrê kal hên, tung mê Hngêi arak liăn Tơnêi têa tơtrŏng séa ngăn, pêi kêi đeăng troăng pơkâ pêi ƀă liăn ngân ƀă Hngêi arak liăn tơniăn tơdroăng pêi cheăng ƀă ki dâi lĕm; pơkuâ troăng hơlâ liăn ngân hbrâ xêh, ƀeăn ƀĕng, teăm tơdrêng ƀă tơrŭm tơtro ƀă troăng hơlâ pơkâ xo hnoăng liăn ƀă mơ’no liăn cheăng dêi hngêi arak liăn, mâu troăng hơlâ kân ki ê, kum mơdât liăn chu rơpâ yă ƀă rak tơniăn tơdroăng cheăng kâ kân, thăm mơnhông tơtêk a kơlo ki hên.

Hngêi arak liăn pơtối prôk hdrối tung pơ’lêh pêi cheăng xúa kơmăi kơmok kum kal khât tung mơnhông mơdêk chêl ăm kơxô̆ liăn ôh tá xúa liăn a ngâ pơtối tâk rơdêi, tơxâng tơdroăng kal vâ rế hía rế kân dêi tơdroăng cheăng kâ. Teăng mâ Chin phuh, Ngế pro xiâm hnê ngăn tơnêi têa mơnhên ƀă kheăn kơdeăn tơdroăng mơ-eăm, khŏm mơ-eăm ƀă châ tơƀrê dêi kơvâ Hngêi arak liăn tung hơnăm 2022.

Ngế pro xiâm hnê ngăn tơnêi têa tối nhên, hơnăm 2023 cho hơnăm ki kơnâ kal khât, pơkâ kơvâ hngêi arak liăn kal pơtối mơnhông mơdêk mâu tơdroăng châ tơƀrê, tơdroăng hbrâ xêh, pơ’lêh nếo, tơmiât pêi rơkê vâ pro tơniăn mâu tơdroăng ki ối tơvâ tơvân, ki tá hâi tro; mơ-eăm pêi pro lĕm tro tâ, châ tơƀrê tâ mâu tơdroăng cheăng, hnoăng cheăng châ pơcháu; thăm pêi pro rơdêi tơdroăng pơ’lêh xúa kơmăi kơmok ƀă tơdroăng mơdêk ki hôm tung tê mơdró, tơniăn gâk kring, tơniăn tâi tâng.