Kơmăng hâi lơ 1/12, a Bà Rịa - Vũng Tàu , pôa Phạm Minh Chính, Ngế pro xiâm hnê ngăn Tơnêi têa veăng hôp ‘na têa châu ƀă on tơhrik kơtâu ƀă khía a têa kơxĭ ki kân hên rơtal dollars dêi Grup ngăn têa châu Việt Nam.

Hơnăm kố, Grup ngăn têa châu Việt Nam (Petrovietnam) hiăng pêi  klêi tơdroăng pơkâ hơnăm ƀă kơxô̆ liăn châ xo 1 rơtuh rơtal liăn, nâp ăm hngêi rak liăn ngân 164 rơpâu rơtal liăn. Petrovietnam hiăng tơbleăng  mâu tơdroăng tơkêa bro ki kal hlối kân, kơmăi kơmok dâi lĕm môi tiah tơdroăng tơkêa bro hrik têa châu  - on tơhrik Lô B - Ô Môn  ƀă tơdroăng tơkêa bro  Lạc Đà Vàng.

Tơbleăng a rôh pro leh, pôa Phạm Minh Chính, Ngế pro xiâm hnê ngăn Tơnêi rơkâu ƀă mơnê mâu tơdroăng mơ-eăm kân rơtế ƀă mâu hvêa prôk ki tơƀrê dêi Petrovietnam ƀă Khu xiâm Kŏng ti veăng tơlo liăn pêi pro ƀă Kih thuât hrik pơhriâ têa châu Việt Nam tung tơdroăng tơbleăng mâu tơdroăng tơkêa bro ‘na têa châu ƀă mâu tơdroăng tơkêa pro on tơhrik nếo mơjiâng, tung mê krê to mâu tơdroăng tơkêa bro on tơhrik kơtâu ƀă khía a têa kơxĭ ai tâi tâng ki kơnâ dêi tơdroăng kĭ tơkêa dâng 12 rơtal dollars.

Ngế pro xiâm hnê ngăn tơnêi têa vâ Grup ƀă Khu xiâm kŏng ti pêi tơƀrê ki rơdêi tâ, ƀă ki mơdêk luâ péa hdroh tung mâu hơnăm la ngiâ, châ dâng 15-20% rêm hơnăm; veăng mơdêk GDP lâp tơnêi têa châ a kơlo ki a ‘ngêi tâ, châ dâng 8% tung hơnăm 2025.