VOV4.Xơ Đăng - Hâi lơ 12/10 hiăng po hneăng hôp kân mâu Kăn xiâm dêi vâi kơdrâi ASEAN rôh má péa ƀă veăng dêi mâu kăn xiâm dêi mâu kong têa ASEAN ƀă teăng mâ mâu kăn xiâm vâi kơdrâi, mâu khu mơdró dêi vâi kơdrâi lo ing mâu kong têa ASEAN ƀă mâu khu tơrŭm cheăng. Kố cho tơdroăng cheăng pêi pơtối klêi po hneăng hôp mâu kăn xiâm dêi vâi kơdrâi ASEAN rôh apoăng châ tơkŭm po a hơnăm 2020 xua Việt Nam, Kăn xiâm hnê ngăn ASEAN drêng mê pơkuâ.

Hneăng hôp ki xiâm po hneăng hôp tơpui tơno a râ kăn xiâm má môi ‘na tơdroăng ôh tá pơrah pơla kơdrâi ƀă kơnốu ƀă mơdêk hnoăng pơkuâ cheăng ăm vâi kơdrâi. Ing mê, pơkâ vâi kơdrâi cho xiâm dêi mâu tơdroăng mơ-eăm tơrŭm ƀă mơjiâng Khu kong têa ASEAN.

Pôa Phạm Minh Chính, Ngế pro xiâm hnê ngăn tơnêi têa veăng hôp mâu kăn xiâm ASEAN roh má péa

Pôa HunSen, Ngế pro xiâm hnê ngăn kong têa Kul, pôa Phạm Minh Chính, Ngế pro xiâm hnê ngăn tơnêi têa pin rơtế ƀă mâu kăn tối mâu tơdroăng ki châ ƀlêi chiâng dêi tơdroăng hriăn plĕng ki nếo, ngăn mê cho tơdroăng ki hdró kal mơhno nhoăm ƀă tơdroăng ki kơnía ƀă hnoăng cheăng pêi ki xiâm tung mơdêk cheăng kâ -rêh ối kơpong ƀă tơhrâ dêi ASEAN tung mơdêk ôh tá pơrah pơla kơdrâi ƀă kơnốu hlối tơrŭm ƀă pơla péa pâ kơdrâi ƀă kơnốu. 

Tơbleăng a hneăng hôp, pôa Phạm Minh Chính tối hnoăng cheăng ki kal dêi mâu khu mơdró kơdrâi tung ‘mâi mơnhông ƀă mơdêk cheăng kâ Việt Nam ƀă tung kơpong. Ngế pro xiâm hnê ngăn tơnêi têa tối nhên tơhrâ dêi Việt Nam tung tơrŭm cheăng ƀă mâu kong têa ASEAN vâ mơdêk tâ nếo ki ôh tá pơrah pơla kơdrâi ƀă kơnốu vâ mơdêk hnoăng pơkuâ cheăng ăm vâi kơdrâi, veăng ‘no hnoăng tung môi tung la ngiâ rế krá kak, ƀă rơdêi dêi kơpong ƀă tung lâp plâi tơnêi.

VOV/Tơplôu: Gương