Drêng troh tơbâ 75 hơnăm Hâi Pôa Hồ Chí Minh - Kăn xiâm hnê ngăn tơnêi têa krếo thế tơ’noăng pâ nhoăm tơnêi têa ( lơ 11/6); Pêi pro tơdroăng cheăng Khế hbrâ mơdât ma tŭi ƀă pơxá inâi “Hbrâ mơdât ma tŭi pêi kơtăng, tơƀrê, mơdêk hnoăng cheăng, ‘nâi tơrŭm ƀă - Xua  vâ mâu kuăn pơlê ôh tá ai ma tŭi”, kơmăng hâi lơ 14/6, Khu xiâm kŏng an - kơ koan cheăng ‘na hbrâ mơdât ma tŭi po leh kân krip tơdroăng púi vâ hơniâp lĕm - Ô eăng khu pú hên, mâu ngế ki pêi cheăng kơhnâ tâp hiâm tâp tuăn.

A rôh leh khu tơkŭm po hiăng khĕn kơdĕn mâu hnoăng ‘no pêi dêi mâu lêng, mâlối 140 ngế ki kơhnâ mơ-eăm châ ô eăng. Tối tơbleăng a rôh leh, pôa Phạm Minh Chính - Ngế pro xiâm hnê ngăn Chin phuh tối, kố cho rôh vâ mơnê kơ mâu lêng ki hiăng hlâ khên tơnôu ƀă khên kơdeăn, pơ-eăng mâu ngế ki ai hiâm mơno lĕm, djâ troăng tro, kơhnâ mơ-eăm tung tơplâ, xua vâ mâu kuăn pơlê pôi tá ai ma tŭi; ing mê, tơbleăng tơdroăng púi vâ ‘na hiâm tuăn hnoăng cheăng pêi, ki mơ-eăm khên tơnôu tơplâ troh hlâ xua kuăn pơlê,  tơdroăng rêh ối vâ pêi tơdroăng ki lĕm “Xua Tơnêi têa piu dêi tơná, Xua vâ hơniâp ăm Kuăn pơlê”.