Kơxo hâi lơ 18/5, a Hà Nội, Khu xiâm pơkuâ ngăn lêng tơkŭm po Leh diâp pri Hơnăm ối nếo ‘nâi hriăn plĕng tơdroăng ki nếo rôh má 23.  Pôa Phạm Minh Chính, Ngế cheăng tung Tíu xiâm kal kí, Ngế pro xiâm hnê ngăn Chin phuh veăng hôp ƀă tối tơbleăng hnê mơhno a rôh leh. 

Teăng mâ Kăn xiâm Đảng, Tơnêi têa, pôa Phạm Minh Chính, Ngế pro xiâm hnê ngăn Chin phuh hâk mơnê rơkâu, khĕn kơdeăn tơdroăng kơdôu mơ-eăm ƀă tơdroăng hiăng hlo tơƀrê dêi mâu ki chêh, khu chêh pú hên ƀă Hơnăm ối nếo tâi tâng mâu lêng. Ngế pro xiâm hnê ngăn tơnêi têa tối nhên, tung la ngiâ, tơdroăng tung lâp plâi tơnêi, tung kơpong tối tơbleăng hdrối kô pơtối pơ’lêh rĕng, phá tơ-ê, pá vâ ‘nâi hdrối.

Tung pơla mê, tơnêi têa pin dế mơ-eăm mơnhông cheăng kâ krê, pơkuâ ngăn dêi rơtế ƀă tơdroăng mơ-eăm khât, hbrâ tơrŭm ƀă lâp plâi tơnêi trâu rơdâ, ki khât, tơƀrê; mơdêk hơ’lêh nếo hriĕn plĕng ki nếo ƀă xúa, mơnhông khoa hok kŏng ngê̆; xúa ki rơkê plĕng, hriăn plĕng ki nếo, mâu kŏng ngê̆ ki dâi lĕm. Malối, hnoăng cheăng mơjiâng Khu lêng dế pơkâ tiô púi vâ ki nếo, xiâm cho mơjiâng Khu lêng kuăn pơlê Kăch măng, rơkê plĕng, tiô túa nếo; rơdêi ‘na kal kí, tiô tơdjâ, tuăn mơno ki lĕm, tơkŭm ƀă kăn ƀô̆.