VOV4.Xơ Đăng - Kơxo lơ 5/9, tung tơdroăng phiu ro hâi kơdrâm phiu ro troh hngêi trung, pôa Phạm Minh Chính, Ngế pro xiâm hnê ngăn Chin phuh pơtroh rơkong rơkâu troh mâu thái cô, kăn ƀô̆, kŏng chưk, viên chưk, mơngế pêi cheăng kơvâ Hnê hriâm rơtế mâu muăn hok tro lâp tơnêi têa ƀă Hngêi trung râ má môi ki ôh tá xê tơnêi têa mơ’no liăn mơjiâng pro Đoàn Thị Điểm rơkong koh hmât tá hiâm mơno, rơkong kơ-êng ƀă rơkong rơkâu hơnăm nếo lĕm tro.

Ngế pro xiâm hnê ngăn tơnêi têa pói vâ tung mâu hâi troh hngêi trung mâu muăn kô châ hriâm mâu tơdroăng hriâm ‘na hiâm mơno pâ mơnê ƀă tơdroăng tuăn pâ pơlê xiâm, tơnêi têa. ‘Nâi pâ mơnê nôu pâ, jâ pôa, thái cô hiăng plâ hâi plâ măng kơhnâ rak ngăn hnê ăm pin. Mâu muăn kô hriâm mâu tơdroăng hriâm ‘na tơdroăng mơ-eăm, mơ-eăm xêh, rêh ối pói vâ pêi tơdroăng kân ƀă ai tơdroăng vâ mơ-eăm, ki má lối cho mâu um méa djâ troăng ahdrối tung tơdroăng mơnhông mơdêk hdroâng mơngế.

Ngế pro xiâm hnê ngăn tơnêi têa xông tơpui koh phiu ro hơnăm hriâm nếo

Ƀă mâu khu xiâm, kơvâ cheăng, ki má lối cho Khu xiâm pơkuâ hnê hriâm – hnê mơjiâng tuăn ngôa rơkê kal tơkŭm tơleăng rêm tơdroăng ki tá hâi klêi, pá puât ƀă mâu tơdroăng pá ki nếo. Hnoăng cheăng a ngiâ kal rĕng tơleăng châ 3 tơdroăng ki tá hâi tŭm, mê cho ôh tá tŭm thái cô – ôh tá tŭm lâm hriâm – ôh tá tŭm kơxop mơ-éa hriâm. Pêi pro tơdroăng pâk vaccine tŭm, khoa hok, châ tơƀrê vâ mâu muăn mo châ troh hngêi trung, nôu pâ hmiân tuăn pêi cheăng, thái cô hmiân tuăn hnê.

A Sa Ly tơplôu ƀă tơbleăng