Kơxêi hâi lơ 26/6, klêi troh a pơlê kong kân Tian Jin (Thiên Tân) dêi Sinuâ, pôa Phạm Minh Chính, Ngế pro xiâm hnê ngăn Chin phuh hiăng pơkuâ khu kăn xiâm Chin phuh Việt Nam veăng hôp ƀă tối tơbleăng a rôh hôp Tơpui tơdroăng tơnêi têa Việt Nam ƀă veăng hôp tơpui ‘na cheăng kâ tung lâp plâi tơnêi (WEF) pơxá: Mơnhông nếo vâ mơnhông tơƀrê tơnêi têa tung la ngiâ. Kố cho tơdroăng tơpui dêi tơnêi têa châ WEF tơkŭm po tung Hneăng hôp, vâ tối ‘na túa pêi cheăng dêi Việt Nam môi tiah um ki mơhno túa ‘na mơnhông cheăng kâ ƀă dế mơdêk pơ’lêh túa cheăng mơdêk pêi lo hên tơmeăm, pro rôh ki tơ’lêi vâ tơpui ‘na mâu tơdroăng vâ pêi, luât pơkâ ƀă tơdroăng ‘no liăn cheăng, tê mơdó kâ a Việt Nam.

Tối tơbleăng a hneăng hôp, pôa Phạm Minh Chính tối tơdroăng ‘na mơnhông cheăng kâ, rêh ối Việt Nam, tối nhên cho tơdroăng cheăng kâ ki po rơdâ, mơhé tung pơla dế trâm xơpá, Việt Nam hiăng hbrâ ví kâi tơkâ luâ xơpá, pơloăng mơnúa ing pa gong, rak tơniăn cheăng kâ kân, mơdêk pêi lo kế tơmeăm, ‘mâi mơnhông tơdroăng cheăng lêng, kring vế tơniăn, hyôh kong prâi hơniâp lĕm, tơniăn ‘na mơnhông mơdêk.

Việt Nam dế pơtối hơ’lêh nếo rơdêi túa mơnhông, ‘mâi mơdêk cheăng kâ, hơ’lêh hên tâ nếo tung hriăn plĕng ki nếo ƀă hơ’lêh kơxô̆, mơdêk hơ’lêh on tơhrrik, mơnhông cheăng kâ ngiât, cheăng kâ ki hơ’lêh. Ngế pro xiâm hnê ngăn Chin phuh pơkâ thế WEF ƀă mâu kong têa tung khu pơtối tơrŭm, veăng kum Việt Nam ‘na kơmăi kơmok, liăn ngân, hnê mơngế pêi cheăng rơkê, rak ngăn tơdroăng cheăng tiô túa nếo nôkố.

Kơxê rơtế tung hâi ki mê, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Robert H. McCooey Jr, kăn xiâm phŏ hnê ngăn grup pơkuâ Nasdaq kong têa Mih. Ngế pro xiâm hnê ngăn tơnêi têa mơnê tơdroăng ki tơmâng ngăn môi tuăn tŏng kum dêi Nasdaq ăm khu mơdró kâ Việt Nam, rơhêng vâ Nasdaq tơpui tơno, tối tơbleăng ăm Việt Nam ‘na liăn ngân mâu kong têa ki kân, troăng hơlâ tơmiât dêi kơchơ mơdró liăn ngân tung lâp plâi tơnêi, tơbleăng ƀă tối ki rơkê plĕng kum mơnhông ‘na tơdroăng liăn pêi cheăng tung tơnêi têa, pơtối rơtế prôk rơtế ƀă tơdroăng ki mơdêk dêi mâu khu mơdró kâ Việt Nam.

Kăn xiâm phŏ hnê ngăn Nasdaq tối phiu ro ‘na tơdroăng ki hlo ‘mâi mơnhông ƀă mơdêk cheăng kâ dêi Việt Nam, mơnhên tối troăng hơlâ pơkuâ liăn ngân dêi Chin phuh; tơngah tung tơdroăng mơnhông rơkê dêi khu mơdró kâ Việt Nam; tơhrâ tŏng kum mâu khu mơdró kâ Việt Nam châ tơrŭm tung lâp plâi tơnêi. Kăn xiâm phŏ hnê ngăn Nasdaq rơhêng vâ châ tơdah Ngế pro xiâm hnê ngăn Chin phuh lăm pôu Sàn giao dịch chứng khoán Nasdaq tung pơla rĕng má môi.

Xuân tung hneăng hôp WEF Thiên Tân, kơxê hâi lơ 26/6, pôa Phạm Minh Chính, Ngế pro xiâm hnê ngăn tơnêi têa hiăng tơdah Yăo sư Klaus Schwab, Ngế ki mơjiâng hlối pro Kăn xiâm hnê ngăn pơkuâ WEF hlối hlo ƀă mâ leh kĭ tơhrâ tung Hlá mơ-éa chôu pâ tơrŭm cheăng (MOU) pơla Việt Nam - WEF hneăng  hơnăm 2023-2026. Ngế pro xiâm hnê ngăn tơnêi têa tối nhên Việt Nam kô pơtối mơ-eăm pêi tiô troăng rơhlâ tơniăn cheăng kâ kân ƀă mơdêk tơƀrê. Ngế pro xiâm hnê ngăn tơnêi têa pơkâ WEF, kum Việt Nam tơ’mot khu ‘no liăn cheăng tơƀrê, malối cho  tung mâu kơvâ cheăng ƀă kơmăi kơmok ki dâi lĕm, hơ’lêh on tơhrik, hơ’lêh kơxô̆, mơjiâng tơmeăm khoăng ƀă mơdêk tơpui tơno. 

Ngế pro xiâm hnê ngăn tơnêi têa xuân pơkâ thế WEF  hnê tối ‘na troăng rơhlâ mơnhông mơdêk dêi lâp plâi tơnêi, hnê ‘na luât tŏng kum Việt Nam mơdêk ivá tơbriât cheăng, ‘mâi hơ’lêh hyôh kong prâi ‘no liăn cheăng, tê mơdró, hmâ ƀă mâu pơkâ, troăng rơhlâ ki nếo.