Kơxê lơ 3/1, Rôh hôp ‘no tơdrêng ing troăng hyôh Internet dêi Chin phuh ƀă mâu kong pơlê mơgêi hnoăng cheăng hơnăm 2022, tơbleăng túa pơkâ mơnhông mơdêk cheăng kâ rêh ối hơnăm 2023 hiăng mơgêi. Ki hên mâu rơkong tơpui tối a rôh hôp pơrá môi tuăn tiah kố, kơlo mơdêk GDP 8.02% hơnăm 2022 cho chía tơniăn. GDP rêm ngế hơnăm 2022 dâng 4.110 dollars, tâk 393 dollars tâng pơchông ƀă hơnăm 2021. Tơpui mơgêi rôh hôp, pôa Phạm Minh Chính, Ngế pro xiâm hnê ngăn Chin phuh tối nhên, mâu tơdroăng ki pêi pro châ kố dêi hơnăm 2022 hên tâ hơnăm 2021 cho mơhno ăm ivá tơrŭm tâi tâng hdroâng mơngế, tơdroăng ki tơdjuôm ivá, môi hiâm mơno khŏm mơ-eăm dêi khu pơkuâ tơdroăng kal kí ƀă kuăn pơlê tung lâp tơnêi têa xua tơdroăng pơkuâ dêi Đảng.

Vâ pêi pro ƀlêi chiâng pơkâ, hnoăng cheăng pơkâ mơnhông cheăng kâ rêh ối pơlê pơla hơnăm 2023 tiô pơkâ dêi Kuô̆k hô̆i, a Rôh hôp ‘no tơdrêng ing tronăg hyôh internet dêi Chin phuh ƀă mâu kong pơlê mơgêi hnoăng cheăng hơnăm 2022, tơbleăng túa pơkâ mơnhông cheăng kâ rêh ối pơlê pơla hơnăm 2023; Chin phuh hiăng pơkâ mơ’no 6 tơdroăng ki kal hnê mơhno pơkuâ ƀă 11 khu hnoăng cheăng troăng hơlâ ki kal mơnhông cheăng kâ rêh ối pơlê pơla hơnăm 2023.