Pơtối pêi cheăng dêi Rôh hôp khu râ kăn xiâm ASEAN 42, hâi lơ 11/5, pôa Phạm Minh Chính, Ngế pro xiâm hnê ngăn Chin phuh hiăng rơtế ƀă kăn pơkuâ mâu kong têa ki veăng hôp a rôh hôp tơpui tơno ‘na mâu tơdroăng a kong têa ê ƀă tung kơpong. Tơpui trâu rơdâ mâu tơdroăng a kong têa ê, tung kơpong, Kăn pơkuâ mâu kong têa vêh tối rơdêi tuăn tơmiât tơdroăng pơkâ dêi ASEAN, tối nhên ki kal dêi hơniâp lĕm, gâk kring, tơniăn a Biển Đông, mơdêk pêi pro tŭm ƀă tơƀrê Tối tơbleăng DOC ƀă mơ-eăm pêi châ Tơdroăng pơkâ COC ki khât, tơƀrê, tơtro luât lâp plâi tơnêi ƀă UNCLOS 1982.

Klêi mê, môi tuăn mơdêk hnoăng cheăng dêi ASEAN tung tŏng kum Myanmar, mơdêk pêi pro tơƀrê Môi tuăn 5 tơdroăng; ƀă tơpui tối ăm dêi rơpó mâu tơdroăng ki xơpá ‘na tơdroăng ki trâm dêi rôh tơplâ a Rusi – Ukraina, tối nhên pêi pro kơtăng mâu tơdroăng pơkâ dêi Luât Khu lâp kong têa ƀă luât lâp plâi tơnêi.

Pôa Phạm Minh Chính, Ngế pro xiâm hnê ngăn tơnêi têa tối, klêi kơ’nâi lối tơdế chal mơjiâng ƀă mơnhông mơdêk, tá hâi la lâi ASEAN ối a tíu ki tro xuân môi tiah athế trâm ƀă hên tơdroăng pơloăng mơnúa môi tiah nôkố. ASEAN rế cho tíu dêi hên hĭn tơdroăng tơmiât tơrŭm ƀă tơdjêp tung kơpong, tơdrêng xuân cho ki kal tung tơxup tơbriât tung tơdroăng cheăng tung la ngiâ ki ó pơla mâu kong têa.