VOV4.Xơ Đăng - Hâi lơ 16/10, pôa Phạm Minh Chính, Ngế pro xiâm hnê ngăn tơnêi têa hiăng ai roh trâm mâ Kăn hnê ngăn, Kăn pơkuâ mâu hngêi arak liăn tê mơdró. Ngế pro xiâm hnê ngăn tơnêi têa kheăn kơdeăn kơvâ Hngêi arak liăn hiăng đi đo teăm hbrâ mơdât tơdrêng mâu tơdroăng pá puât, pơloăng mơnúa ing pa kong ƀă tung dế tung pơla kố nah, pêi pro tơtro, tơdrêng 2 hnoăng cheăng: rế mơdât châ tơƀrê liăn chu rơpâ yă, rak tơniăn cheăng kâ kân; pơtối rế xing xoăng ăm kơxô̆ liăn mung tŏng kum tơdroăng cheăng kâ.

Pôa Phạm Minh Chính, Ngế pro xiâm hnê ngăn trâm mâ khu râ kăn pơkuâ mâu hngêi arak liăn tê mơdró

Tung la ngiâ, Ngế pro xiâm hnê ngăn tơnêi têa pơkâ mâu hngêi arak liăn tê mơdró pêi pro tiô luât, thăm mơdêk ivá pơkuâ, ivá rak ngăn liăn ngân, rak tơniăn tơdroăng pêi cheăng; Tơkŭm mơdêk tơdroăng ki châ tơƀrê tung mơdró, ki tơƀrê hôm kơxô̆ liăn ăm mung, tơniăn tơdrăng lĕm; Mơjiâng troăng pêi cheăng;  mơdêk châ tơƀrê tơdroăng xing xoăng kơxô̆ liăn mung. Pơtối mơdêk hnoăng pơlê pơla, thăm veăng xăm kơklêa kơdroh kơtiê, pâ mơnê hnoăng mâu ngế ai hnoăng tơnêi têa, xua pơlê pơla.

VOV/Tơplôu: A Sa Ly