Kơmăng lơ 6/11, a Hà Nội, pôa Phạm Minh Chính, Ngế pro xiâm hnê ngăn tơnêi têa veăng a Leh pêi pro Hâi Luât tơnêi têa Kŏng hòa xah hô̆i chuh ngiah Việt Nam (9/11) hơnăm 2022.  Tơpui a leh mitting pôa Phạm Minh Chính, Ngế pro xiâm hnê ngăn tơnêi têa rơhêng vâ, rêm ngế pin ƀă mâu tơdroăng pêi pro ki nhên, ai pơxúa kal, tơdjuôm ivá pro tơdjâk hiâm mơno loi nhuô̆m luât, veăng kum ăm tơdroăng pơkâ luât ƀă luât cho mot trâu hngế tung hiâm mơno ƀă pêi pro dêi rêm ngế kuăn pơlê, khu mơdró kâ, dêi kơ koan, khu tơrŭm ƀă dêi lâp pơlê pơla.

Hiâm mơno mê athế chiâng tro tơdroăng pêi pro ƀă mơhno túa lĕm tro tung pơlê pơla.  Tơdroăng ki mơjiâng – tơbleăng – pêi pro - séa ngăn luât châ pêi pro tro tiô ki bro mâu ki kơnía ‘na mơhno túa lĕm tro chiâng ivá cheăng ki kal dêi tơnêi têa. Tung la ngiâ, Ngế pro xiâm hnê ngăn tơnêi têa pơtối séa ngăn kơtăng, mơdêk ki hlê plĕng, pêi pro tơƀrê tơdroăng pơkâ Hneăng hôp khu kăn lâp tơnêi têa rôh má 13 dêi Đảng; rĕng tơbleăng tơdroăng pơkâ Tơnêi têa má 6 hneăng 13 ‘na “Pơtối mơjiâng ƀă pêi klêi tơnêi têa hnoăng pơkuâ xah hô̆i chuh ngiah Việt Nam tung hneăng ki nếo” klêi kơ’nâi châ hbru ăm hnoăng pơkâ.