Hâi lơ 9/7, a Hà Nội, pôa Phạm Minh Chính, Ngế pro xiâm hnê ngăn Chin phuh troh veăng ƀă xông tơpui a Leh phiu ro hiăng mơjiâng pro kêi đeăng Hngêi hơdruê Hồ Gươm xua Khu xiâm pơkuâ Kŏng an tơrŭm ƀă pơlê kong kân Hà Nội tơkŭm po.

Troh veăng Leh phiu ro hiăng mơjiâng pro kêi đeăng Hngêi hơdruê Hồ Gươm, pôa Phạm Minh Chính, Ngế pro xiâm hnê ngăn tơnêi têa tối nhên, tơdroăng mơ’no liăn mơjiâng Hngêi hơdruê Hồ Gươm mơhno tơdroăng ki tơmâng dêi Đảng ŭy Kŏng an Tơnêi têa, Khu râ kăn pơkuâ Khu xiâm pơkuâ Kŏng an Tơnêi têa, Khu râ kăn pơkuâ Khu xiâm kŏng an, Vi ƀan pơlê kong kân Hà Nội ƀă tơdroăng mơnhông mơdêk khôi túa lĕm tro, kum pêi pro troăng hơlâ dêi Đảng, Tơnêi têa ‘na khôi túa lĕm tro, hơdruê xuăng ƀă mơjiâng pơlê kong xiâm Hà Nội tiô túa ‘’Khôi túa lĕm tro ton nah – Rơkê – Tiô rơxông nếo’’.

Vâ xúa, mơnhông ki châ tơƀrê tơmeăm khoăng, Ngế pro xiâm hnê ngăn Chin phuh pơkâ thế Khu xiâm pơkuâ Kŏng an hnê mơhno ai pơkâ vâ pơkuâ, pêi cheăng tiô khoa hok, châ tơƀrê vâ Hngêi hơdruê Hồ Gươm cho tơmeăm khoăng ki xiâm dêi khu cheăng Kŏng an kuăn pơlê ƀă pơlê kong xiâm Hà Nội; tơmâng tơkŭm po mâu tơdroăng mơhno khôi túa lĕm tro, ngê̆ thuât, tơdroăng ki kal vâ pêi hnoăng cheăng kal kí dêi Đảng, Tơnêi têa, Khu xiâm pơkuâ Kŏng an ƀă pơlê kong kân Hà Nội.