Kơxo lơ 21/12, pôa Phạm Minh Chính, Ngế pro xiâm hnê ngăn Chin phuh pơkuâ po Rôh hôp thăm mơdêk tơ’mot tơmối ôm hyô kong têa ê mot a Việt Nam. Pôa Vũ Đức Đam, Ngế pro xiâm phŏ hnê ngăn tơnêi têa, pôa Nguyễn Văn Hùng, ngế xiâm ngăn mơhno túa lĕm tro, tơ’noăng ivá ƀă ôm hyô rơtế pơkuâ po rôh hôp. Rơtế veăng hôp ai kăn pơkuâ mâu khu xiâm kơvâ cheăng ƀă châ tơdjêp ‘no tơdrêng ing troăng hyôh internet ƀă 63 to kong pơlê, pơlê kong kân tung lâp tơnêi têa.

Sap ing khế 3/2021, Việt Nam hiăng vêh lôu péa tâi tâng mâu tơdroăng cheăng ôm hyô. Maluâ lôu péa tơdah tơmối kong têa ê rĕng tâ tâng pơchông ƀă hên kong têa ki ê tung kơpong la tơdroăng ki xúa rôh tơ’lêi hlâu kố vâ mơnhông tơdroăng ki ôh tá tơƀrê, tá hâi tơ’mot châ hên ngế tơmối ôm hyô; kơxô̆ tơmối ôm hyô kong têa ê troh Việt Nam tá hâi châ môi tiah tơdroăng ki poí vâ, nếo bu châ dâng 42% tâng pơchông ƀă túa pơkâ mơ’no.

Tơpui a rôh hôp, pôa Phạm Minh Chính tối nhên, ôm hyô cho môi kơvâ cheăng ki kal, veăng kum rế hía rế kân tung tơdroăng cheăng kâ dêi hên kong têa; pâ thế ai tuăn tơmiât nếo, túa ki xúa nếo, tiô troăng “Tối tơbleăng mâu tơdroăng ôm hyô ki tơmối kal vâ ôh ti xê bu cho tơdroăng ki pin hiăng ai hlâu”.